बुधबार, कात्तिक २७, २०७६

समाज

पहाड चढेका मधेशी नेताले पाएनन् समर्थक–प्रस्तावक

पहाड चढेका मधेशी नेताले पाएनन् समर्थक–प्रस्तावक

पोखरा- जल तथा सिँचाई विज्ञ डा. कृष्णचन्द्र साह केही वर्षयता राजनीतिमा सक्रिय छन्।

जनकपुरधामको रामस्वरुप रामसागर बहुमुखी क्याम्पसका संस्थापक परिवारका डा.साहको छवि त्यस क्षेत्रमा राम्रो छ। अमेरिकाबाट अध्ययन गरी फर्केका डा.साह जल तथा सिँचाईका क्षेत्रमासमेत काम गरेका छन्।

संविधानसभाको दोस्रो निर्वाचनमा उनी विजय गच्छदार नेतृत्वको मधेशी जनअधिकार फोरम (लोकतान्त्रिक) को टिकटबाट जनकपुरधाम क्षेत्रबाट उम्मेदवार भएका थिए। तर सद्भावना पार्टीका उम्मेदवार संजय साहसँग पराजित भए।

त्यसपछि डा.साहले अहिले आफ्नै नेतृत्वमा युनाइटेड डेमोक्रेटिक पार्टी, नेपाल गठन गरेका छन्। पार्टी आधिकारिक रुपमा दर्ता भने हुन सकेको छैन।

पछिल्लो समय देशमा राष्ट्रिय एकताको भावना कमजोर भएको भन्दै उनले राष्ट्रिय एकताको पक्षमा वकालत गर्दै आएका छन्। जसका लागि उनी पहाडी मैदानको कास्की– २ बाट उप निर्वाचन लड्न पुगेका थिए।

‘राष्ट्रिय एकताको भावनालाई बल मिलोस् भनेर कास्की गएको थिएँ।’ डा. साहले भने, ‘देशमा बढ्दै गएको राष्ट्रियता सम्बन्धी विवाद समाधान होस् भन्ने चाहना थियो।’

कास्कीबाट उम्मेदवारी दिएर सांकेतिक रुपमा राष्ट्रिय एकतामा बल पुर्याउन पुगेका डा. साहले उम्मेदवारीका लागि प्रस्तावक र समर्थक नै पाएनन्।

करिब एक साता पहिले कास्की पुगेका डा.साहले त्यस क्षेत्रको विभिन्न स्थानमा घरदैलोसमेत गरिसकेका थिए।

तर, उम्मेदवारी दर्ता गराउने दिन बिहीबार उनले प्रस्तावक र समर्थक नपाउँदा उम्मेदवारी दर्ता गराउन सकेनन्।

‘प्रस्तावक र समर्थकका लागि धेरै जनासँग कुराकानी भयो। सबैले ससर्त प्रस्ताव लिएर आए।’ डा. साहले भने, ‘केहीले पैसा मागे। कसैले जागिर लगाइ दिन भने।

कसैले पार्टीको डमी उम्मेदवार बन्न भने। तिनीहरुको प्रस्ताव नमान्दा मैले प्रस्तावक र समर्थक पाइन।’

प्रस्तावक र समर्थक नपाउँदा उम्मेदवारी दर्ता गर्नबाट बञ्चित भएका डा.साह पोखराबाट फर्किने क्रममा भने, ‘मैले जे भावना बोकेर आए त्यो भावना यहाँ पाईन।’

प्रतिक्रिया दिनुहोस्