मंगलबार, कात्तिक २६, २०७६

समाज

जागिर लगाइदिने प्रलोभनमा बालकको अपहरण

जागिर लगाइदिने प्रलोभनमा बालकको अपहरण

काठमाडौं- पर्सा वीरगंज उपमहानरपालिका–२५ सिर्सियाका अम्जद खान र उनका १४ वर्षीय छोरा काभ्रे बनेपाको एक मोटरसाईकल वर्कशपमा काम गर्दै आएका थिए।

अम्जदलाई खबर नै नगरेर उनका छोरा कार्तिक १० गते एक्लै घरतिर हिँडे। एक्लै पर्सा घर जान लागेका उनी एकाएक गायब भए।

बुबाले बारम्बार फोन गर्दा पनि छोरोले फोन उठाएनन्। घरमा फोन गरेर बुझ्दा छोरा उता पनि नपुगेको खबर आउने, फोन गर्दा नउठाउने भएपछि एकाएक के भयो भनेर अम्जदलाई निकै छटपटी भयो।

भोलिपल्ट ११ गते छोराकै मोबाईलबाट अम्जदको मोवाईलमा फोनको घण्टी बज्यो। छोराको फोन आयो भनेर खुसी हुँदै फोन उठाएका अम्जदको कानमा अपरिचित मान्छेको आवाज गुञ्जियो ‘तिम्रो छोरालाई हामीले अपहरण गरेका छौं, १२ लाख रुपैँया नदिए हत्यासमेत हुनसक्छ।’ सुरुमा त उनले पत्याएनन्। तर बारम्बार त्यहि नम्बरबाट फोन गरेर फिरौती माग्ने र नदिएमा बालकको हत्या गर्ने धम्की आइरहेपछि उनले छोरा अपहरणमा परेको विश्वास गरे।

अम्जदले छोरा अपहरणमा परेको जानकारी प्रहरीलाई गराए। फिरौती माग गर्दै बारम्बार फोन आइरहँदा उनले अपहरणकारीलाई रकमको जोहो गर्दैछु भनेर जवाफ दिइरहे।

फिरौती माग्ने व्यक्तिलाई प्रहरीकै सल्लाहमा अम्जदले मंगलबार राति आफ्नै घर सिर्सिया खलवा टोलमा फिरौतीबापतको रकम लिन बोलाए।

फिरौती रकम लिन पर्साकै पोखरीया नगरपालिका–६ सोनवरी बस्ने २० वर्षीय राजकुमार दाससहित तीन जनाको समूह मंगलबार सबा १ बजेको समयमा आईपुगे।

अपहरणकारीको समूह पेस्तोल देखाई अम्जदको हातमा रहेको झोला खोसेर भाग्न खोज्दा उनलाई नियन्त्रणमा लिन प्रहरीले गोली चलायो। उक्त गोली राजकुमारको दाहिने खुट्टाको घुँडामुनिको भागमा लागेर उनी ढले। अन्य दुई अपहरणकारी भाग्न सफल भएको प्रहरीले जनायो। प्रहरीले बालकलाई सकुशल उद्धार गर्यो।

प्रहरीले अपहरणकारीले प्रयोग गरेको बीआर २२ जे ०८०३ भारतीय नम्बरको मोटरसाईकल, १ थान कटुवा पेस्तोल र त्यसमा प्रयोग हुने ५ राउण्ड गोली बरामद गरेको जनाएको छ।

इटहरीमा भएको थियो भेट

प्रहरीका अनुसार आफ्नो घर पर्सा जान हिँडेका बालकसँग अपहरणकारीहरुको हेटौडामा भेट भयो। अपहरणकारी राजकुमार पनि वीरगंजकै भएकाले बालकले चिनेका थिए।

पर्साका प्रहरी प्रमुख प्रहरी उपरीक्षक सोमेन्द्र सिंह राठौरका अनुसार अपहरणकारीले राम्रो जागिर लगाईदिन्छु भनेर बालकलाई प्रलोभन देखाए।

‘वीरगंज पुगेपछि बालकलाई जर्वजस्ती मोटरसाईकलमा राखेर भारततर्फ लगेको बुझिएको छ’ राठौरले भने, ‘बालकलाई भारतमै बन्धक बनाएर बुबासँग फिरौती माग गरेछन्।’

घाईते अपहरणकारी राजकुमारको नारायणी अस्पतालमा उपचार भैरहेको छ। प्रहरीले उनीविरुद्ध अपहरण तथा शरीर बन्धकमा मुद्दा चलाउने जनाएको छ।

प्रतिक्रिया दिनुहोस्