बुद्ध मूर्ति तोडफोडप्रति कांग्रेसको आपत्ति

काठमाडौं- नेपाली कांग्रेसले रुपन्देही जिल्लाको तिलोत्तमा नगरपालिकाअन्तर्गत सिद्धार्थ राजमार्गको बीच भागमा राखिएका विश्व शान्तिका अग्रदूत गौतम बुद्धको मूर्तिहरु तोडफोड गरेको समाचारप्रति गम्भीर ध्यानाकर्षण भएको जनाएको छ। 

‘विश्वमा नेपाललाई चिनाउने शान्ति र सहअस्तित्वलाई प्रेरित गर्ने भगवान् गौतम बुद्धका मूर्तिहरुलाई तोडफोड गर्नु धर्म, संस्कृति र मूल्यमान्यताको अपमान हो’, प्रमुख सचेतक बालकृष्ण खाणद्वारा हस्ताक्षरित विज्ञप्तिमा भनिएको छ।

धार्मिक, सांस्कृतिक सहिष्णुतामा आँच आउने र धार्मिक द्वन्द्वलाई निम्त्याउने गरी नियोजित रुपमा बुद्धको मूर्तिलाई तोडफोड गर्ने कार्य अत्यन्त निन्दनीय एवं घोर आपत्तिजनक भएको कांग्रेसले जनाएको छ।

विज्ञप्तिमा भनिएको छ, ‘यस घटनाको सत्यतथ्य छानबिन गरी यसमा संलग्न दोषीलाई यथाशीघ्र कानुनी कारबाही गर्न कांग्रेस संसदीय दल माग गर्दछ।’