भैरहवा- अज्ञात समूहले बुटवल ६ लेन सडक खण्डअन्तर्गत पर्ने नयाँ मिल शंकरनगर सडकमा राखिएका गौतम बुद्धका ५ वटा मूर्ति तोडफोड गरिएको छ।
बुद्ध मूर्ति अज्ञात समूहले तोडफोड गरेको हो । तिलोत्तमा नगरपालिकाले लुम्बिनी भ्रमण वर्ष २०७६ को अवसर पारेर गत वैशाख १ गते शंकरपुरदेखि जोगीकुटीसम्म २–३ सय मिटरको दुरीमा बुद्धका २२ वटा मूर्ति राखेको थियो । उक्त मूर्तिको प्रदेश सरकारका पर्यटनमन्त्री लिल गिरीले अनावरण गरेका थिए ।
शान्तिका प्रतीक बुद्ध मूर्ति रातरात तोडिनु अपराधको पराकाष्ठा भएको तिलोत्तमा नगरका प्रमुख वासुदेव घिमिरेले बताए । उनले भने, ‘पर्यटन प्रवद्र्धनका लागि बुद्धनगरमा राखिएको बुद्धका मूर्ति तोडफोड गर्नेलाई तत्काल पक्राउ गरेर कडा कारबाही गर्नुपर्दछ । हामीले खबर पाउनासाथ प्रहरी प्रशासनलाई भनिसकेका छौं । हामी पनि आफ्नो तरिकाले यो विषयलाई गम्भीर रुपमा लिएर खोजतलास गर्दैछौं ।’
बुद्ध जन्मस्थल लुम्बिनीको प्रवेशद्धार सिद्धार्थनगर र तिलोत्तमा नगरको छ लेन सडकमा बुद्धका मूर्तिहरु नगरपालिकाको लगानीमा राखिएको छ । रातिको समयमा बुद्धको मूर्तिहरु तोडिएको प्रारम्भिक अनुसन्धानबाट देखिएको रुपन्देहीका प्रमुख जिल्ला अधिकारी अर्जुनप्रसाद पोखरेलले बताए ।
उनले भने, ‘सुरक्षाको युनिटहरु परिचालित भइसकेको छ । हामीले गहिरो ढंगले अध्ययन अनुसन्धान गर्दैछौं । अपराधी छिट्टै पत्ता लाग्छ र कानुनी कारबाहिमा पर्नेछ ।’
प्रकाशित: Dec 31, 2017| 18:23 आइतबार, पुस १६, २०७४