मंगलबार, मंसिर ३, २०७६

खेलकुद

इंग्ल्याण्डविरुद्ध न्यूजिल्याण्डको अग्रता

इंग्ल्याण्डविरुद्ध न्यूजिल्याण्डको अग्रता

काठमाडौं - इंग्ल्याण्डविरुद्धको पाँच टी-२० सिरिजमा न्यूजिल्याण्डले २-१ को अग्रता बनाएको छ।

मंगलबार सम्पन्न तेस्रो टी-२० खेलमा इंग्ल्याण्डलाई १४ रनले पराजित गर्दै न्यूजिल्याण्डले अग्रता बनाएको हो। जितका लागि १८१ रनको लक्ष्य पछ्याएको इंग्ल्याण्डलाई निर्धारित ओभरमा ७ विकेटको क्षतिमा १६६ रनमा रोक्दै न्यूजिल्याण्डले दोस्रो जित दर्ता गरेको हो।

इंग्ल्याण्डका लागि डेभिड मलनले ५५ तथा जेम्स भिन्सले ४९ रन बनाए। त्यस्तै कप्तान मोर्गान र बेन्टनले समान १८/१८ रन जोडे। न्यूजिल्याण्डका टिकनर र लकी फर्गुसनले २-२ विकेट लिए।

त्यसअघि टस जितेर पहिले ब्याटिङ गरेको न्यूजिल्याण्डले निर्धारित ओभरमा ७ विकेट गुमाउँदै १८० रन बनाएको थियो। न्यूजिल्याण्डका लागि कोलिन डी ग्राण्डहोमले सर्वाधिक ५५, मार्टिन गप्टिलले ३३ तथा रस टेलरले २७ रनको योगदान दिएका थिए। इंग्ल्याण्डका टम कुर्रानले २ विकेट लिए।

पहिलो टी-२० न्यूजिल्याण्ड तथा दोस्रो टी-२० इंग्ल्याण्डले जितेको थियो। चौथो टी-२० शुक्रबार हुनेछ।

प्रतिक्रिया दिनुहोस्