आठौंका स्वर्ण पदक विजेताले पाए पुरस्कार 

काठमाडौं- आठौं राष्ट्रिय खेलकुद प्रतियोगिता सम्पन्न भएको लगभग तीन माहिना पछि स्वर्ण पदक विजेता र कीर्तिमान बनाउने खेलाडीहरु तोकीएको पुरस्कार पाएका छन् ।  

राष्ट्रिय खेलकुद परिषद (राखेप) ले मंगलबार आठौंमा स्वर्ण पदक विजेता र कीर्तिमान बनाउने खेलाडीहरुलाई यसअघि तोकीएको पुरस्कार प्रदान गरेको हो । आठौंमा व्यक्तिगत र टिम स्पर्धा गरी स्वर्ण जित्ने ७०७ खेलाडी र कीर्तिमान बनाउने १६ गरी कुल ७२३ खेलाडीलाई राखेपले पुरस्कार प्रदान गरेको हो । 

आठौंमा कुल ३७२ स्वर्णका लागि प्रतिस्पर्धा भएको थियो । राखेपले आठौंमा व्यक्तिगततर्फ स्वर्ण विजेता खेलाडीलाई जनही १५-१५ हजार र टिमतर्फ स्वर्ण जित्ने खेलाडीलाई जनही ७-७ हजार प्रदान गर्ने जनाएको थियो । त्यस्तै कीर्तिमान भंग गर्ने खेलाडीलाई जनही २५-२५ हजार रुपैयाँ प्रदान गरिएको छ ।