जनकपुरधाम- अविरल वर्षापछि आएको बाढीका कारण प्रदेश २ को जनजीवन प्रभावित छ । बाढीका कारण प्रदेश २ मा १४ जनाको मृत्यु भएको छ भने हजारौं विस्थापित भएका छन् ।
हरेक वर्ष वर्षातमा आउने बाढीको प्रमुख कारण चुरे विनाश र नदीनालाको दोहन रहेको बताइएको छ । चुरेक्षेत्रभित्र बस्दै गरेको अवैध बस्ती र केही माफियाहरुका कारण खोलानदीको निरन्तर दोहन भइरहेको छ ।
तर सरकारका एकजना मन्त्रीले भने चुरेक्षेत्रको संरक्षणबारे केही बोल्न चाहेका छैनन् । उद्योग वाणिज्य तथा आपूर्तिमन्त्री मातृका यादवले चुरे क्षेत्रमा भइरहेको विनाशबारे आफू केही बोल्न नसक्ने बताएका छन् । चुरे संरक्षण हुनुनपर्ने आफ्नो धारणा रहेको तर यसबारे तत्काल केही बोल्न नसक्ने यादवले बताए ।
मंगलबार जनकपुरमा आयोजित पत्रकार सम्मेलनमा सरकारले चुरेको संरक्षण् किन गर्न नसकेको सञ्चारकर्मीहरुको जिज्ञासामा ‘आफू यसबारे तत्काल केही बोल्न नसक्ने अवस्थामा रहेको’ मन्त्री यादवले जबाब फर्काए ।
जंगल फडानी गरी चुरेक्षेत्रमा निरन्तर बढ्दै गरेको अवैध बस्ती नियन्त्रण गर्न सरकारले के गर्दैछ भत्रे सञ्चारकर्मीको जिज्ञासामा मन्त्री यादवले फेरी पनि आफू यसबारे केही नबोल्ने उल्लेख गरे ।
बाढीका कारण भएको क्षतिको धनुषा र सिरहाको स्थलगत अनुगमन गरेका मन्त्री यादवले बाँधहरुको मर्मत र सम्भार गर्नतर्फ उच्चस्तरबाट खासै पहल नभएको आफूले पाएको बताए ।
‘बाढीले ठुलो क्षति पुर्याएको छ, ठाउँठाउँमा बस्तीहरु डुबेका छन्,’ उनले भने,‘टुटेको बाँधको मर्मत र बाँचेकोलाई संरक्षण गर्न ठुलो चुनौती देखिएको छ । उच्चस्तरले यसतर्फ ध्यान दिनुपर्दछ ।’
अनुगमनको क्रममा आफूले हेरेको त्रासदीबारे सरकारलाई जानकारी गराइ सम्बन्धीत मन्त्रीलाई समेत प्रभावित क्षेत्रको अनुगमन गर्न आग्रह गर्ने उनले बताए । बाढी पहिरोबाट जोगिन दीर्घकालीन रुपमा तयारी हुन नसकेको स्वीकार गर्दै मन्त्री यादवले प्राकृतिक प्रकोपजस्ता विपद्हरुबाट जोगिन सरकार पूर्वतयारीतर्फ गम्भीरतापूर्वक सरकार लागि परेको जिकिर गरे ।
बाढी प्रभावितहरुलाई राहत पुर्याउने कार्यको लागि सरकारको मात्र बाटो नपर्खेर पक्षविपक्ष नहेरी एक भएर जुट्न उनको आग्रह थियो ।
प्रकाशित: Dec 31, 2017| 18:23 आइतबार, पुस १६, २०७४