महन्तले नै बेचे अर्बौ पर्ने मठमन्दिरको जग्गा

काठमाडौं- राजधानीबाट प्रकाशित मंगलबारका राष्ट्रिय दैनिक अखबारहरुले विविध विषयका खबरलाई प्राथमिकतामा पारेका छन् ।
 
आजको नागरिक दैनिकले महोत्तरीका एक महन्तले सवा तीन अर्ब भन्दा बढिको मन्दिरको सरकारी जग्गा बेचेको खुलासा गरेको छ ।

महोत्तरीको मटिहानी स्थायी घर भएका लक्ष्मीनारायण मठ मटिहानीका मानमहन्त जगन्नाथ दास वैष्णवले गुठीअन्तर्गतको जग्गा आफ्नो स्वामित्वमा ल्याएर बेचेको खुलासा भएको हो । 

सरकारी जमिनको संरक्षण नहुँदा संस्थानअन्तर्गत रुपन्देही र धनुषा जिल्लामा लक्ष्मीनारायण, राजनकीलगायत मन्दिरको करिब सात विघा जमिन बिक्रि गरेर उनले हिनामिना गरेका छन् ।

धनुषामा ५ विघा र रुपन्देहीमा २ विघा जमिन विभिन्न मितिमा विक्रि गरेको भेटिएको हो । जसको अहिले चलन चल्तीको मूल्य धनुषाको जग्गाको ३ अर्ब र रुपन्देहीको २३ करोड रहेको समाचारमा उल्लेख छ ।

यस्तै सरकार राजस्व लक्ष्य भेट्टाउन चुकेको विषयलाई पनि नागरिकले प्राथमिकताका साथ छापेको छ ।

८ अर्ब ३१ अर्बको राजस्व संकलन गर्ने लक्ष्य राखेकोमा ६ खर्ब ८९ अर्ब रुपैयाँ मात्रै राजस्व असुली गरेको छ । यो लक्ष्यको ८३ प्रतिशत हो । लक्ष्यको ९० प्रतिशतमाथि नजानु सम्भवत अहिलेसम्मकै न्यून भएको समाचारमा उल्लेख छ ।

आजको अन्नपूर्ण पोस्ट्ले भने बाढीपहिरोको वितण्डासँगै सरुवा रोगको त्रास बढेको विषयलाई मुख्य समाचार बनाएको छ । समाचारमा जनाइएअनुसार अविरल वर्षासँगै २८ जिल्लामा पिउने पानीको स्रोत दुषित भएको छ । प्रभावित क्षेत्रमा झाडापखाला, आउँ, हैजा, टाइफाइटजस्ता रोगहरु देखिन थालेको छ ।
 
कान्तिपुरले पनि बाढीपिडितको बिचल्लीलाई प्राथमिकताका साथ छापेको छ । पशुसँगै सुत्छन् बाढीपीडित शीर्षकमा उसले खबर लेखेको छ ।  

रौतहटका अधिकांश बाढीपीडित विद्यालय, मन्दिर र आफन्तकहाँ आश्रय लिएर बसेका छन् । पीडितहरू विद्यालयका डेस्कबेञ्च जोडेर सुत्छन् । त्यहि गाईवस्तु बाँधेका छन् । यसबाट विशेषगरी बालबालिका र वृद्धवृद्धालाई समस्या भएको छ ।

गाईबस्तुले गरेको फोहोरले बाढीपीडितमा महामारी लाग्ने हो कि भन्ने त्रास बढ्दो छ । विस्थापितको बासस्थान र पशु बाँध्ने ठाउँ एउटै भएकाले महामारीको डर बढेको हो ।

विस्थापितले एक सयभन्दा बढी गाईभैंसी, बाख्रा विद्यालयमा बाँधेका छन् । त्यहीँ नजिकै विस्थापितले चुलो बनाएका छन् । तर खाद्यान्न अभावमा धेरैको चुलोमा आगो नबलेको समाचारमा उल्लेख छ ।

यस्तै कान्तिपुरले नेपाल प्रवेशको भिसा स्टिकरबापत उठ्ने करोडौं रुपैयाँ दस्तुर हिनामिना भएको खुलासा गरेको छ ।

विदेशस्थित ३९ नियोग र त्यसअन्तर्गतका ५० भन्दा बढी अवैतनिक दूतले चालु आर्थिक वर्षमा मात्रै जारी भएकामध्ये करिब १ लाख भिसा स्टिकरको रकम दाखिला नै गरेका छैनन् । भिसा दस्तुरमा हालै गरिएको संसोधनअनुसार ३०, ५० र १ सय २० डलर लिने व्यवस्था गरिएको छ ।