काठमाडौं- बेलायती फुटबल क्लब म्यान्चेस्टर युनाइटेडका नेपाली समर्थकहरूको एमयुएफसी विजयचोक युथ क्लबले सी डिभिजन छनौट खेल्ने भएको छ। भदौ १० गतेबाट हुने सहिद स्मारक सी डिभिजन छनोट खेलका लागि क्लब खेल तालिकामा समावेश भएको हो।
म्यान्चेस्टरका समर्थकहरूले सन् २०१२ मा एमयुएफसी क्लब बनाएका हुन्। बिदाका दिन शनिबार क्लबका सदस्यहरू भेला भएर एकापसमा फुटबल खेल्दै सुरु भएको क्लबमा सदस्यको संख्या बढ्दै गएपछि सी डिभिजन छनोटसम्मको यात्रा तय गरेको हो।
क्लबलाई डिजिटल भुक्तानी सेवा प्रदायक प्रभु पेले पेमेन्ट पार्टनरका रूपमा साथ दिएको छ। यससम्बन्धी सम्झौतामा कम्पनी र क्लबका तर्फबाट हस्ताक्षरसमेत भइसकेको छ। क्लबको डिजिटल पेमेन्ट पार्टनरमा प्रभु पेले सघाउनुले तल्लो तहमा फुटबल खेल्ने क्लबहरूलाई प्रोत्साहन गर्ने विश्वास लिइएको छ।
सामाजिक सेवासँगै व्यवसायिक फुटबललाई पनि निरन्तरता दिनका लागि क्लब आगामी सी डिभिजन लिग खेल्न लागेको क्लबले जनाएको छ।
सी डिभिजन छनोटका लागि ७८ क्लब दर्ता भएका छन्।