माधव नेपालको साथ छोडेका '३ भाइ' बने एमाले कार्यदल सदस्य

काठमाडौं- पुस ७ पछि माधव कुमार नेपाललाई साथ दिएका एमालेका १० स्थायी कमिटी सदस्यहरू मंगलबारको बैठकमा सहभागी भएका थिए। मंगलबारको बैठकले उनीहरूलाई विशेष जिम्मेवारी दिएर पठाएको छ। 

कार्यदलमा भीम रावल, घनश्याम भुसाल र सुरेन्द्र पाण्डे पनि छन्। केही समयअघि सम्म उनीहरू नेता नेपालका पक्षमा थिए। तर नेपालले नयाँ दल गठन गरेपछि यी तीन जनासहित १० जना स्थायी कमिटी सदस्य पुनः केपी ओली नेतृत्वको एमालेमा नै फर्किएका छन्। यस्तै ईश्वर पोखरेल, विष्णु पौडेल र लेखराज भट्ट पनि कार्यदलका सदस्य बनाइएका छन्। 

एमाले एकताका लागि ओलीलाई दिएको १० बुँदे प्रस्ताव कार्यान्वयनका लागि ओली तयार भएसँगै यसमा आउने जटिलता समाधान गर्न सुझाव दिने र पार्टीका विभाग तथा अन्य निकायलाई पूर्णता दिन सघाउने कार्यादेश कार्यदललाई छ। कार्यदलमा यसले उनीहरूलाई एमालेमै सक्रिय हुनका लागि दबाब बढाएको छ। 

उता नेपाल नेतृत्वको दलले भने ओली पक्षमा सहभागी भएका १० जनालाई मध्यपन्थी अवसरवादीको संज्ञा दिएको छ।