पोखरामा गोली चल्यो, एकजना घाइते

काठमाडौं - पोखराको उत्तमचोकमा प्रहरीले लागूऔषध कारोबारी माथि गोली चलाएको छ। विशेष सूचनाका आधारमा लागूऔषध कारोबारीलाई पक्राउ गर्न गएको प्रहरी टोलीमाथि नै आक्रमणको प्रयास भएपछि प्रतिरक्षाका लागि गोली चलाइएको र सो क्रममा एक लागूऔषध कारोबारी घाइते भएको जिल्ला प्रहरी कार्यालय कास्कीले जानकारी दिएको छ।

प्रहरीले चलाएको गोली लागि जोन भन्ने गोविन्द थापा घाइते भएका छन्। उनको खुट्टामा गोली लागेको र पश्चिमाञ्चल क्षेत्रीय अस्पताल पोखरामा उपचार भइरहेको जिल्ला प्रहरी कार्यालय कास्कीका प्रहरी प्रमुख एसपी दानबहादुर कार्कीले जानकारी दिए। प्रहरीले थापाको साथबाट नर्फिन, फेनार्गन र डाइजोपाम लगाएतका १५ सय थान लागूऔषध बरामद गरेको जनाएको छ। घाइतेको अवस्था सामान्य छ।

प्रहरीको पटके सूचीमा रहेका जोन केही समयअघिमात्र कतारबाट सजाय भुक्तान गरेर फर्किएका थिए। उनी सन २०१४ देखि २०१८ सम्म कतारमा कारागारमा थिए।