विप्लवका २२ कार्यकर्ता पक्राउ

काठमाडौं- नेत्रविक्रम चन्द विप्लवका २२ नेताकार्यकर्ता कास्कीबाट पक्राउ परेका छन् । कास्कीको उत्तरी भूभागमा विप्लब समूहले गतिविधि बढाएको सूचना पाएपछि जिल्ला प्रहरी कार्यालयबाट खटिएको प्रहरी टोलीले उनीहरुलाई पक्राउ गरेको हो।

कास्कीको अन्नपूर्ण गाउँपालिका वडा– ११ उरीस्थित आमा समूहको भवनमा   संयुक्त बैठक बसिरहेका बेला शनिबार साँझ ६ .१५ बजे उनीहरु पक्राउ परेको कास्कीका एसपी दानबहादुर कार्कीले बताए।

पक्राउ पर्नेमा कास्की जिल्ला सेक्रेटरी आक्रोश भनिने विवेक भण्डारी, जिल्ला सदस्य परिवर्तन भनिने सन्तोष परियार तथा अखिल क्रान्तिकारीका केन्द्रीय सदस्य मिलन राई, अखिल क्रान्तिकारी जिल्ला अध्यक्ष काजी गुरुङ, उपाध्यक्ष आस्था नेपाली, पिएन क्याम्पसका अखिल क्रान्तिकारी अध्यक्ष प्रकाश बास्तोला, विद्यार्थी नेता सुजन सापकोटा लगायत छन्।

एसपी कार्कीले विप्लव समूहले अन्नपूर्ण क्षेत्रमा पर्यटन व्यवसायीसँग जबरजस्ती चन्दा असुली भइरहेको जानकारी पाएपछि सर्च गर्दा उनीहरु पक्राउ परेको जानकारी दिए।

अन्नपूर्ण गाउँपालिका वर्षाका कारण सडक अवरुद्ध छ । उनीहरुलाई  चार घन्टाको पैदल यात्राबाट आइतबार बिहान जिल्ला प्रहरी कार्यालय ल्याइएको छ । पक्राउ परेका २२ जनामाथि थप अनुसन्धान भइरहेको कार्कीले बताए।