अमित र दिपेन्द्रको उत्कृष्ट प्रदर्शनमा पुलिस विजयी

काठमाडौं- विभागीय टोली नेपाल पुलिस क्लबले प्रधानमन्त्री कप पुरुष एकदिवसीय क्रिकेट प्रतियोगितामा लगातार दोस्रो जित निकालेको छ । मुलपानी क्रिकेट मैदानमा बुधबार भएको खेलमा प्रदेश नम्बर १ लाई ७५ रनले पराजित गर्दै पुलिसले दोस्रो जित निकालेको हो ।

पुलिसले दिएको १ सय ८६ रनको मध्यम लक्ष्य पछ्याएको प्रदेश १ ले ३८.३ ओभरमा सबै विकेट गुमाउँदै मात्र ११० रन बनाउन सक्यो । प्रदेश १का लागि सन्नी पुनले २७ रन जोडे । 

त्यस्तै मनिस थापाले १९, दिपेश कँडेलले १५, फिर्दोस अन्सारीले १२ र पुष्प थापाले १० रन जोड्न बाहेक अन्य ब्याट्सम्यानले दोहोरो अंकमा रन छुन सकेनन् । पुलिसका लागि दिपेन्द्र सिंह ऐरीले ५ विकेट लिए । ललित राजवंशीले तीन तथा आरिफ शेख र सागर ढकालले एक एक विकेट लिए ।  

यसअघि टस जितेर पहिले ब्याटिङ गरेको पुलिसले ४३.१ ओभरमा अलआउट हुँदै १८५ रन बनाएको थियो । पुलिसका लागि अमित श्रेष्ठले शतकीय पारी खेलेका थिए । उनले ११८ बलमा १५ चौका र १ छक्का प्रहार गर्दै १०६ रनको शतकीय पारी खेलेका हुन् । 

त्यस्तै ३८ बलमा ३ चौका सहित कुशल भुर्तेलले २४, मन्जीत श्रेष्ठ र रामनरेश गरीले समान ११-११ तथा पवन सराफले १० रनको योगदान दिए । प्रदेश १ का लागि फिर्दोस अन्सारी, सिदान्त लोहनी, कमल खत्री, पुष्प थापा र दिपेश कँडेलले दुई दुई विकेट लिए ।