मुलुक साढे १० खर्ब ऋणमा, सरकार आक्रामक !

काठमाडौं- राजधानीबाट प्रकाशित मंगलबारका राष्ट्रिय दैनिक अखबारहरुले विप्लव समुहको आक्रमकता पछि सरकार कठोर बनेको र सरकारले सार्वजनीक गरेको आर्थिक सर्वेक्षणको विषयलाई प्राथमिकताका साथ छापेका छन् । 

आजको कान्तिपुरले मुलुक करिब साढे १० खर्ब ऋणमा परेको विषयलाई मुख्य समाचार बनाएको छ । सोमबार सार्वजनिक आर्थिक सर्वेक्षणअनुसार डलर महंगिनु र वैदेशिक ऋण बढ्नुलागायत कारणले नेपालको ऋणभार चुलिएको हो ।
 
२०७५ फागुनसम्म भुक्तानी गर्न बाँकी सार्वजनिक ऋण ९ खर्ब ७८ अर्ब ४५ करोड रुपैया रहेको सर्वेक्षणमा उल्लेख छ । यसको हिसाव गर्दा प्रत्येक नेपालीको टाउकोमा ३६ हजार रुपैयाँ ऋण थोपरिएको समाचारमा उल्लेख छ । 

यस्तै कान्तिपुरले कहाँ चुके सुरक्षा निकाय शीर्षकको खबरलाई पनि प्राथमिकताका साथ छापेको छ ।

मुलुकको राजधानीमा भएको शृंखलावद्ध विस्फोटले सरकार प्रतिवन्धित समुहको गतिविधि नियन्त्रणमा चुक्दै गएको त होइन भन्ने प्रश्न उब्जिएको छ। विप्लव समुहका गतिविधिमा प्रतिबन्धको घोषणापछि पनि उक्त समुहका कार्यकर्ता यसरी सक्रिय रहनुले सुरक्षा निकाय कहाँ चुक्दै छ भन्ने प्रश्न खडा भएको समाचारमा उल्लेख छ ।
 
आजको नागरिक दैनिकले भने बलियो सरकारको औसत काम शीर्षकमा मुख्य समाचार छापेको छ । आर्थिक सर्वेक्षणले पूर्वाधार विकासमा यो वर्ष सरकारको गति जसोतासो औसत मात्रै रहेको देखिएको छ ।
 
सर्वेक्षण अनुसार भौतिक पूर्वाधार लगायत शिक्षा, स्वास्थ्य, खानेपानी, सरसफाइजस्ता सामाजिक क्षेत्रको भौतिक प्रगति सामान्य देखिएको छ । सरकारले वर्षौदेखि यिनै क्षेत्रलाई उच्च प्राथमिकता दिँदै सबैभन्दा बढी लगानी गरेको छ ।

दुईतिहाइको स्थिर र बलियो सरकार बनेका बेला मुलुकमा विकासले फड्को मार्ने अपेक्षा सर्वसाधरणको भए पनि सर्वेक्षणले त्यस्तो नदेखाएको समाचारमा उल्लेख छ । 

यस्तै नागरिक दैनिकले विप्लव गतिविधिबारे गुप्तचरको रिपोर्टमा प्रधानमन्त्री कार्यालयबाट हेलचक्र्याइँ भएको पनि खुलासा गरेको छ । विप्लवले सहर केन्द्रित गतिविधि बढाएको भनेर अनुसन्धान विभागले बेलैमा दिइएको रिपोर्टलाई प्रधानमन्त्री कार्यालयले गम्भीरका साथ नलिदा शृंखलावद्ध विस्फोट भएको समाचारमा उल्लेख छ ।
 
आजको अन्नपूर्ण पोस्ट्ले भने विप्लव समुहले शृंखलावद्ध विस्फोट गराएपछि सरकार झन् कठोर बनेको विषयलाई मुख्य समाचार बनाएको छ । प्रधानमन्त्री केपीशर्मा ओलीले विस्फोट गराउने विप्लव समुहलाई आतंककारी भनेका छन् भने गृहमन्त्री रामबहादुर थापाले विस्फोटमा मर्ने नेपाली नागरिक नभएको दाबी गरेका छन् ।
 
यस्तै आजको नयाँ पत्रिकाले गृहमन्त्री रामबहादुर थापाले विप्लवले चार कम्पनी सेना बनाइसके भनेर दिएको अभिब्यक्तिलाई मुख्य समाचार बनाएको छ । उसले प्रश्न गरेको छ– 'सरकारसँग यति ठूलो सुचना छ भने तयारी के छ ? वार्ता की बल ?'