काठमाडौं- विप्लव समूहको नेकपाले संविधान र राज्य विरोधी गतिविधि गर्दै आएको गृहमन्त्री रामबहादुर थापाले बताएका छन् ।
प्रतिनिधिसभाको सोमबारको बैठकमा बोल्दै गृहमन्त्री थापाले चार तहको सेना बनाएर विप्लव समुहले आतंक मच्चाएको बताएका हुन् । उनले भने, ‘उनीहरुले जनसरकार भन्ने जनपरिषद् गठन गरेका छन्। जनसेनाका रुपमा चार कम्पनी गठन गरेका छन् । र, यसैको आडमा आतंक मच्चाइ राखेका छन् ।’
पार्टीका नाममा हिंसात्मक गतिविधि बढाइरहेको भन्दै गृहमन्त्रीले त्यस्ता गतिविधि नियन्त्रणमा सुरक्षा निकाय संवेदनशील भएर लागिपरेको बताए। उनले विप्लव समूहलाई वार्तामा ल्याउन सरकार सक्रिय रहेको पनि बताए ।
केही वर्षयता उनीहरुले गर्दै आएको सशस्त्र गतिविधिको पछिल्लो समय राजधानी केन्द्रित रहेको गृहमन्त्रीको भनाइ छ ।
गृहमन्त्रीका अनुसार आइतबार राजधानीमा भएका शृंखलाबद्ध विस्फोटमा मारिने सबै चार जना विप्लव समूहका हुन् । घटनामा ६ जना घाइते भएका छन् । घाइते पनि समूहसँग नै आबद्ध रहेको गृहमन्त्री थापाले दबी गरे ।
आइतबार राजधानीको सुकेधारास्थित एउटा सैलुनमा बम विस्फोट हुँदा तीन जनाको मृत्यु भएको छ। यस्तै अनामनगरमा विस्फोट हुँदा एक जनाको मृत्यु भएको छ ।
प्रकाशित: Dec 31, 2017| 18:23 आइतबार, पुस १६, २०७४