क्रियाशील सदस्यता विवाद 'टुंग्याएर' कार्यदलले देउवालाई बुझायो प्रतिवेदन

काठमाडौं– सत्तारुढ दल नेपाली कांग्रेसमा लामो समयदेखि विवादित क्रियाशील सदस्यताको विवाद टुंगिने भएको छ। उक्त विवाद समाधान गर्न गठित तीन सदस्यीय कार्यदलले सभापति शेरबहादुर देउवालाई सोमबार प्रतिवेदन बुझाएको छ। र, प्रतिवेदनमा विवाद समाधानको खाकासमेत प्रस्तुत गरिएको छ। 

वरिष्ठ नेता रामचन्द्र पौडेलसमेतको उपस्थितिमा कार्यदलले देउवालाई प्रतिवेदन बुझाएको छ। नेताहरु कृष्ण सिटौला, मिनेन्द्र रिजाल र रमेश लेखक सदस्य रहेको कार्यदलले प्रतिवेदन बुझाएपछि क्रियाशील सदस्यताको विवाद टुंगिने नेताहरुले बताएका छन्।

पछिल्लो पटक बसेको केन्द्रीय समिति बैठकले क्रियाशील सदस्यता विवाद समाधानका लागि सिटौला, रिजाल र लेखक रहने गरी कार्यदल गठन गरेको थियो। बैठकले भदौ तीन गतेभित्र क्रियाशील सदस्यता विवाद टुंग्याउनुपर्ने जिम्मेवारी कार्यदललाई दिएको थियो। कार्यदलले ४ दिन ढिलो गरी प्रतिवेदन सभापतिलाई बुझाएको छ। 

यसअघि क्रियाशील सदस्यता विवाद छानबिनका लागि नेता रमेश लेखकको संयोजकत्वमा समिति गठन भएको थियो। उक्त समितिले प्रतिवेदन बुझाएपछि पनि विवाद समाधान नभएपछि केन्द्रीय समिति बैठकले तीन सदस्यीय कार्यदल गठन गरेको थियो।