काठमाडौं- प्रधानमन्त्री तथा नेकपाका अध्यक्ष केपी शर्मा ओलीले मदन भण्डारीको विचार नै अन्तिम सत्य नभएको बताएका छन् । मदन आश्रित स्मृति दिवसका अवसरमा आयोजित कार्यक्रममा बोल्दै ओलीले समय अनुसार परिमार्जन गर्दै जानु पर्नेमा जोड दिएका छन् ।
उनले घुमाउरो भाषामा मदन भण्डारीले प्रतिपादन गरेको जनताको बहुदलीय जनवाद (जवज) पुरानो भएको र अब समय सान्दर्भिक नयाँ विचार अगाल्नु पर्ने संकेत गरे । पूर्व एमाले र पूर्व माओवादी एक भएको वर्ष दिनसमेत पुगेको सन्दर्भमा ओलीले नयाँ विचार धारा आगाल्नु पर्ने संकेत गरेका हुन् ।
कार्यक्रमलाई ओली अगाडी सम्बोधन गरेको अध्यक्ष पुष्पकमल दाहाल प्रचण्डले मदन भण्डारीको विचारमात्र बोकेर बस्ने कि अघि बढ्ने भन्ने प्रश्न गरेका थिए । त्यसको जवाफमा ओलीले भने, ‘अध्यक्ष कमरेड प्रचण्डले भने जस्तै जबजलाई सुत्रको रुपमा घोक्ने, कण्ठ गर्ने वा मदनले हिजो जे भन्नुभयो, त्यहिमात्र अन्तिम होइन । हामी उहाँको विचारलाई मागर्दर्शक सिद्धान्तका रुपमा समायानुकुल ढंगले सिर्जनात्मक प्रयोग गर्छौं ।’
एक वर्ष लगाएर पार्टीको सांगठनिक एकता टुंग्याएसँगै नेकपामा वैचारिक बहस सुरु भएको छ । यहि सिद्धान्तलाई लिएर युवा संघको स्थापना दिवसको कार्यक्रममा प्रचण्ड र नेता इश्वर पोखरेलबीच जुहारी नै चलेको थियो ।
मेरो सरकार स्याल हुँइया मात्रै
यस्तै मदन आश्रित स्मृति दिवसका अवसरमा आयोजित कार्यक्रममा बोल्दै प्रधानमन्त्री ओलीले राष्ट्रपतिको सम्बोधनको विषयमा प्रतिपक्षी दल नेपाली कांग्रेस र बुद्धिजीवीले गरेको विरोधलाई स्याल हुँइयाको संज्ञा दिएका छन् । उनले सरकारको नीति तथा कार्यक्रममा आलोचना गर्ने ठाँउ नभेटेर सम्बोधनको विषयलाई उचालिएको आरोप लगाए ।
प्रधानमन्त्री ओलीले कांग्रेसले राष्ट्रपतिको नभएर गणतन्त्रको विरोध गरिरहेको पनि दाबी गरे । सरकारको आलोचनाको नाममा अनुशासनहीन र अराजक समाज निर्माणको प्रयास भइरहेको उनको भनाइ थियो ।
ओलीले सरकार विकासको गतिमा अघि बढेको र भ्रष्टाचारविरुद्ध डटेर लागेको दावी गरे । उनले सरकारले गरेका राम्रा कामको प्रचार गर्न र सरकारको विरोध गर्नेहरुविरुद्ध डटेर लाग्न पनि कार्यकर्तालाई निर्देशन दिए ।
प्रकाशित: Dec 31, 2017| 18:23 आइतबार, पुस १६, २०७४