काठमाडौं – अख्तियार दुरुपयोग अनुसन्धान आयोगका पूर्व आयुक्त राजनारायण पाठक ७८ लाख धरौटी बुझाएर रिहा भएका छन्। विशेष अदालत काठमाडौैंले पाठकसँग धरौटीवापत ७८ लाख रुपैयाँ माग गरेपछि उनी बैंक ग्यारेन्टीमा रिहा भएका हुन्।
नेपाल बंगलादेश बैंकको बैंक ग्यारेन्टीपछि पाठक रिहा भएका हुन्। विशेष अदालतका अध्यक्ष बाबुराम रेग्मी, सदस्य तथा न्यायाधीशहरु द्वारिकामान जोशी र प्रमोदकुमार श्रेष्ठ वैद्यको इजलासले बुधबार पाठकसँग ७८ लाख रुपैयाँ धरौटी माग गरेको थियो।
७८ लाख घुस लिएको अभियोगमा उनी भ्रष्टाचारको मुद्दा खेपिरहेका थिए। अख्तियार दुरुपयोग अनुसन्धान आयोगले आफ्ना पूर्व आयुक्त राजनारायण पाठकविरुद्ध घुस लिएको अभियोगमा चैत १२ मा विशेष अदालतमा भ्रष्टाचार मुद्दा दायर गरेको थियो।
मुद्दाको बयानका लागि पाठक बुधबार विशेष अदालतमा हाजिर भएका हुन्। भक्तपुरको नेपाल इन्जिनियरिङ कलेजको सम्पत्ति बाँडफाँटसम्बन्धी मुद्दा मिलाइदिने भन्दै उनले ७८ लाख घूस लिएका भिडियो सार्वजनिक भएको थियो। पाठकलाई घूस दिने चाँगुनारायण, भक्तपुरस्थित नेपाल इन्जिनियरिङ कलेजका अध्यक्ष लम्बोदर न्यौपाने भने फरार छन्।
प्रकाशित: Dec 31, 2017| 18:23 आइतबार, पुस १६, २०७४