सुर्खेत – सल्यानमा आगलागीबाट दश घर जलेका छन्। बिहीबारदेखि इन्द्रेणी सामुदायिक वनमा लागेको आगोले शुक्रबाररातीसम्म दश वटा घरगोठ जलेका हुन्। वनमा लागेको आगो बस्तीमा आउदा छत्रेश्वरी गाउँपालिका वडा नं. ६ रामकाँडा ९ घर र कपुरकोट गाउँपालिको मुलपानीमा एक घर पूर्ण रुपमा जलेको जिल्ला प्रहरी कार्यालय सल्यानले जनाएको छ।
शुक्रबार दिउँसो २ बजेतिर बस्तीमा पसेको आगोले रामकाँडाका जीत बहादुर रानाका, ओम बहादुर र टुल्कबहादुर बुढाथोकीको एक घर एक गोठ गरी ६ घर जलेका हुन्। त्यस्तै सोही ठाउँका हरिबहादुर राना, गौरीलाल र पदम बहादुर रानाका एक÷एक घर जलेर नष्ट भएका जिल्ला प्रहरी कार्र्यालय सल्यानका डिएसपी वीरेन्द्रबहादुर शाहीले जानकारी दिए।
उनका अनुसार आगलागीबाट मानविय क्षति नभएपनि घरमा रहेको अन्नपात, लत्ताकपडा जलेर खरानी भएको छ। आगलागीबाट अनुमानित साढे १४ लाख क्षति भएको प्रहरीले जनाएको छ।
यस्तै कपुरकोट गाउँपालिकाको मुलपानीमा पनि शुक्रबार नै एक घर जलेर नष्ट भएको छ। तर जलेको घरको विवरण भने आइसकेको छैन। आगो नियन्त्रणमा लिन नेपाली सेना, नेपाल प्रहरी, शसस्त्र प्रहरी र स्थानीय लागि परेका छन्।
प्रकाशित: Dec 31, 2017| 18:23 आइतबार, पुस १६, २०७४