प्रधानमन्त्री देउवा र भाजपा विदेश विभाग प्रमुख चौथाइवालेबीच भेटवार्ता

काठमाडौं– प्रधानमन्त्री शेरबहादुर देउवासँग आइतबार भारतीय जनता पार्टीका विदेश विभाग प्रमुख डा. विजय चौथाइवालेले भेटवार्ता गरेका छन्।  चारदिने अनौपचारिक भ्रमणका क्रममा आएका उनले देउवासँग शिष्टाचार भेटवार्ता गरेका हुन्। 

प्रधानमन्त्रीनिवास बालुवाटारमा भएको भेटवार्तामा चौथाइवाले भारतीय प्रधानमन्त्री नरेन्द्र मोदीको सन्देश सुनाएको स्रोतले जानकारी दियो। देउवा प्रधानमन्त्री भएपछि भेट्ने चौथाइवाले भारतका सबैभन्दा उच्चस्तरीय नेता हुन्। 

देउवा प्रधानमन्त्री भएपछि भारतीय समकक्षी नरेन्द्र मोदीसँग टेलिफोनमा कुराकानी भएको थियो। 

चौथाइवालेले कांग्रेस सहमहामन्त्री एवं पूर्वपरराष्ट्रमन्त्री डा. प्रकाशशरण महतसँग पनि भेटवार्ता गरेका छन्। भेटमा नेपाली कांग्रेस र भारतीय जनता पार्टीबीच सम्बन्ध विस्तारबारे छलफल भएको बताइएको छ।चौथाइवाले डा. महतको निमन्त्रणामा आएका हुन्।