प्रदेश १ राजधानी : संसदमा प्रस्ताव, सडकमा हड्ताल

इटहरी- विराटनगरलाई प्रदेश १ को स्थायी राजधानी बनाउन संसद्मा प्रस्ताव पेश भएसँगै विराटनगरमै आमहड्ताल गरिएको छ ।  आइतबार पेश भएको प्रस्ताव पारित गर्नका लागि दवाव दिने उद्देश्यले विभिन्न दल र नागरिक अगुवाहरुले हड्ताल गरेका हुन् ।

आइतबार नेकपा र प्रमुख प्रतिपक्षीले विराटनगरलाई प्रदेश १ को स्थायी राजधानी बनाउने प्रस्ताव संसद्मा पेश गरेका थिए । विराटनगरबाट स्थायी राजधानी सार्न चलखेल हुनसक्ने भन्दै बन्द गरिएको आयोजकहरुले बताएका छन् ।

विराटनगरबाट राजधानी अन्त सार्न लागेको भन्दै हडताल गरिएको आयोजकहरुले बताएका छन ।  भेषप्रसाद धमलाको संयोजकत्वमा भएको हडतालमा नेकपा, नेपाली कांग्रेस, विराटनगरमा केन्द्रित विभिन्न व्यापारिक तथा सामाजिक संस्थाहरुले सहयोग गरेका छन् ।

विराटनगरलाई स्थायी राजधानी बनाउन शान्तपूर्ण दबाब समितिको नाममा भएको हडतालले विराटनगरको जनजीवन प्रभावित बनेको छ । यातायात ठप्प छन् भने संघसंस्थाहरुसमेत बन्द गरिएको विराटनगरका पत्रकार प्रेम देवानले बताए ।

को को छन हडतालका अगुवा?

नेकपाबाट नेताहरु महेश रेग्मी र पारुल क्षेत्री आन्दोलनको अगुवाइ गरिरहेका छन् । रेग्मी सहसंयोजक हुन् भने क्षेत्री सदस्य । यस्तै नेपाली कांग्रेसबाट मोदराज घिमिरे र गणेश कोइराला सहसंयोजक रहेका छन् । राप्रपाका महोमद काबिर र संघीय समाजवादी फोरमका राजकुमार यादव पनि हडताल आयोजकको सदस्य छन् ।  उद्योग संगठन मोरङका अध्यक्ष भीम घिमिरे र मोरङ व्यापार संघका अध्यक्ष  पवन सारडा हडताल समितिका सदस्य छन् ।

आइतबार नेकपा र नेपाली कांग्रेसले संस्थागत निर्णय गरेर विराटनगरलाई प्रदेशको राजधानी बनाउने प्रस्ताव ल्याएका थिए । कांग्रेसबाट विराटनगरमा स्थायी राजधानी हुने प्रस्ताव प्रमुख सचेतक केदार कार्कीले गरे । कार्कीलाई कांग्रेसकै शिवनारायण गनगाई र संघीय समाजवादी फोरमका सांसद जयराम यादवले समर्थन गरे ।

विराटनगरमा स्थायी राजधानी ताक्दै इटहरी तथा गोठगाउँमा पनि राजधानीका संचरनाहरु बनाउने गरी नेकपाका प्रमुख सचेतक बुद्धिकण राजभण्डारीले प्रस्ताव गरे । उनको प्रस्तावमा सांसदहरु लिलम बस्नेत, विजयकुमार विश्वास, राजकुमार ओझा, सवित्रा कुमारी रेग्मी र यशोदा अधिकारीले समर्थन गरेका थिए । अहिलले यसै प्रस्तावमा आपत्ति जनाउँदै सत्तारुढ दलका नेतासहित विराटनगरमा हडताल सुरु भएको हो ।