काठमाडौं - सरकारको वार्षिक नीति तथा कार्यक्रम संसद्मा प्रस्तुत हुँदैछ । संघीय संसद्को दिउँसो ४ बजे बसेको संयुक्त बैठकमा राष्ट्रपति विद्यादेवी भण्डारीले नीति तथा कार्यक्रम प्रस्तुत गर्न लागेकी हुन् ।
झण्डै दुई तिहाई नेतृत्वको सरकारको दोस्रो नीति तथा कार्यक्रम सार्वजनिक हुन लागेको हो । सरकारले आर्थिक विकास, रोजगारी सिर्जना र सामाजिक सुरक्षाका कार्यक्रममा जोड दिने गरी नीति तथा कार्यक्रम तयार पारेको जनाएको छ ।
स्रोतका अनुसार अघिल्लो वर्षमा जस्तै यसपटक पनि सरकारले महत्वाकाक्षी योजनाहरु धेरै समेटेको छ । अघिल्लो वर्ष लिएको अधिकांश लक्ष्यमा सरकार फेल भएको छ ।
गत वर्ष सरकारले प्रतिब्यक्ति आय आगामी पाँच वर्षभित्र दोब्बर बनाउने लक्ष्य लिएको थियो । तर, चालू आर्थिक वर्षमा नेपालीको प्रतिव्यक्ति आय १०३४ डलर पुगेको छ । यो गत आवको भन्दा ३६ डलरले मात्रै बढी हो।
यस्तै चालू आवको बजेटले करिब ८ प्रतिशत आर्थिक वृद्धि हुने अनुमान गरेको थियो, तर ६.८१ प्रतिशतले मात्रै आर्थिक वृद्धि हुने तथ्यांक विभागको प्रक्षेपण छ ।
यसैगरि सरकारकाले पाँच वर्षमा कृषिको उत्पादन दोब्बर बनाइनेछ भनेर लक्ष्य लिएको थियो । तर, प्रमुख खाद्यान्न चामलको आयात अघिल्लो वर्षको तुलनामा १९।४ प्रतिशत बढेर २३ अर्ब ४ करोड रुपैयाँको आयात भएको छ ।
त्यस्तै चालू आवको आठ महिनामा फलफूल आयात ८२.४ प्रतिशतले बढेर ६ अर्ब ६५ करोड पुगेको छ । तरकारी आयात ३६.४ प्रतिशतले बढेर १० अर्ब ४९ करोडको आयात भएको छ ।
यी बाहेक विमानस्थल, सडक, जलविद्युतलगायतका क्षेत्रमा लिएको लक्ष्य पनि सरकारले पुरा गर्न सकेन । अधिकांश लक्ष्यमा सरकार असफल भएको छ । विज्ञहरुका अनुसार ज्यादा महत्वाकाक्षी योजना बनाएकै कारण सरकार कार्यान्व्यन गर्न असफल भएको हो ।
प्रकाशित: Dec 31, 2017| 18:23 आइतबार, पुस १६, २०७४