एजेन्सी-अजेन्टिनी तथा बार्सिलोनाका स्टार खेलाडी लियोनल मेस्सीले बार्सिलोनाका लागि ६०० औं गोलको कोसेढुंगा पार गरेका छन् । ३१ वर्षीय मेस्सीले बुधबार लिभरपुलविरुद्ध भएको खेलमा दुई गोल गर्दै बार्साका लागि ६०० औं गोलको कोसेढुंगा पार गरेका हुन् ।
युरोपियन च्याम्पियन्स लिग अन्तर्गत सेमिफाइनलको पहिलो लेगमा बार्सलोनालाई ३-० गोल अन्तरको जित दिलाउँदा मेस्सीले दुई गोल गरेका थिए । सन् २००४-२००५ को सिजन देखि बार्सिलोनाको सिनियर टोलीमा बिताउँदै आएका मेस्सीले बार्सिलानाका लागि हाल सम्म ६८३ खेल खेलेका छन् ।
बार्सिलोनामा १५ सिजन खेलेका उनले बार्सिलोनाका लागि ६०० गोल गरे । मेस्सीले स्पेनिस ला लिगामा हाल सम्म ४५० खेल खेल्दै ४१७ गोल गरेका छन् । त्यस्तै कोपा डेल रेमा ७२ खेल खेल्दा ५० गोल, च्याम्पियन्स लिगका १३४ खेल खेल्दा ११२ गोल तथा अन्य २७ खेलमा २१ गोल गरी बार्सिलोनाका लागि ६००औं गोल पुरा गरेका हुन् ।
मेस्सी बार्सिलोनाका सर्वाधिक गोलकर्तासँगै असिस्टकर्ता खेलाडी पनि हुन् । उनी बार्सिलोनाका लागि सबैभन्दा बढी उपाधि जित्ने पहिलो खेलाडी समेत हुन् ।
प्रकाशित: Dec 31, 2017| 18:23 आइतबार, पुस १६, २०७४