कक्षा १२ को परीक्षा सुरु, चार लाख विद्यार्थी सहभागी 

काठमाडौं- कक्षा १२ को वार्षिक परीक्षा आइतबारबाट सुरु भएको छ । परिक्षामा  चार लाख २८ हजार ५२ परिक्षार्थी सहभागी रहेको राष्ट्रिय परीक्षा बोर्डले जनाएको छ । 

परीक्षामा सबैभन्दा कम मनाङबाट ५९ जना सहभागी भएका छन् भने सबैभन्दा बढी काठमाडौँबाट  ६२ हजार ५८८ परीक्षार्थी सहभागी भएको बोर्डले जनाएको छ।

एसईई परीक्षामा प्रश्नपत्र चोरी भएपछि प्रश्नपत्र राखिएको कोठामा २४ घण्टा सीसीटीभीको व्यवस्था गरिएको छ। परीक्षामा अनियमितता हुन नदिन यसपटकबाट कडाइ गरिएको बोर्डका अध्यक्ष प्रा डा. चन्द्रमणी पौडेलले जानकारी दिए । 

यस्तै कक्षा ११ को परिक्षा यहि वैशाख २९ गतेबाट सञ्चालन हुने भएको छ । कक्षा ११ को परिक्षामा पाँच लाख आठ हजार ४९४ जना सहभागी हुने बोर्डले जनाएको छ । ११ मा पनि सबैभन्दा कम मनाङमा बाटै सहभागी हुने भएका छन् । भने बढि काठमाडौंका विद्याथी रहने छन् । मनाङ बाट ५१ जना सहभागी हुँदा काठमाडौंबाट ७१ हजार ५२७ जना सहभागी हुनेछन् । 

बोर्डका परीक्षा नियन्त्रक कृष्ण शर्माले कक्षा ११ र १२ का लागि देशभरिमा एक हजार १०७ परीक्षा केन्द्र कायम गरिएको जानकारी दिए। परीक्षालाई मर्यादितरूपमा सञ्चालन गर्न १३ हजार २८४ जना सुरक्षाकर्मी परिचालन गर्न लागिएको छ। परीक्षामा अमर्यादित कार्य गर्नेलाई छ महिना कैद र एक लाख रुपियाँसम्म जरिवानाको व्यवस्था छ।