प्रदेश २ मा फेरि चेली जलाइयो

जनकपुुरधाम- पछिल्ला केहिदिनयता प्रदेश २ मा छोरी चेलीहरु असुरक्षित बन्दै गएकी छिन् । 

संघीय  सरकार र प्रदेश सरकारले शान्ति सुरक्षा तथा महिला हिंसाजस्ता घटनाहरु कम हुँदै गएको दाबी गरिरहेपनि एकपछि अर्को यस्ता घटनाहरु सार्वजनिक भइरहेको छ ।

धनुषामा एक नवविवाहिता निर्मला यादवलाई श्रीमानले मट्टितेल छर्केर जलाएको घटना दुई साता नबित्दै सिरहामा पुनः एक महिलालाई जलाइएको छ । घरायसी विवादमा सिरहा नगरपालिका–८ की २१ वर्षीया कञ्चनदेवी मण्डल खत्वेलाई जलाइएको हो ।

विहीबार बिहान करिब ११ बजे समयमा घरायसी विवादहुँदा कञ्चनको शरीरमा आगो लगाएर जलाइएको छ । शरीरको ८० प्रतिशत भाग जलेको कञ्चनको अवस्था गम्भीर रहेको बताइएको छ । घटनापछि कञ्चनका पति बेचन मण्डल फरार भएका छन् भने सासुलाई प्रहरीले नियन्त्रणमा लिएको सिरहाका प्रहरी उपरीक्षक जीवन श्रेष्ठले बताए ।

घटना लगत्तै प्रहरीले उद्धार गरी कञ्चनलाई उपचारका लागि धरानस्थित वीपी कोइराला विज्ञान प्रतिष्ठान पठाइएपनि शरीरको अधिकांश भाग जलिसकेकाले त्यहाँ उपचार सम्भव नभएपछि काठमाण्डौं रेफर गरिएको छ ।

‘घरायसी विवादहुँदा घरमा आगोले जलेको अवस्थामा कञ्चन फेला परेकी थिइन्’ उपरीक्षक श्रेष्ठले भने,‘घटनाको अनुसन्धानका लागि कञ्चनकी सासुलाई हामीले नियन्त्रणमा लिएका छौं । पति बेचन फरार छन । उनको खोजी भइरहेको छ ।’

यसअघि ५ वैशाखमा धनुषाको शहीदनगर नगरपालिका–१ मा २० वर्षीया नवविवाहिता निर्मला यादवलाई पति मुकेश गोइतले शरीरमा मट्टितेल छर्केर आगो लगाएका थिए ।

घरायसी विवादको हुँदा घरमा कोहि नभएको मौका छोपेर मुकेशले निर्मलाको हात खुट्टा बाँधेर जिउमा मट्टितेल खन्याई आगो लगाएर घरको ढोका बन्द गरेर फरार भएका थिए । गाउँलेले निर्मलाको उद्धार गरी उपचारका लागि जनकपुर अञ्चल अस्पताल भर्ना गराएका थिए ।

तर जनकपुरमा उपचार सम्भव नभएपछि निर्मलाको अहिले काठमाण्डौंको बर्न अस्पतालमा उपचार भइरहेको छ । निर्मलाको शरीरको ४० प्रतिशत भाग जलेको बताइएको छ ।