भूकम्पले भत्किएका ४० प्रतिशत सरकारी भवन बनेनन्

काठमाडाैं- विनाशकारी भूकम्पले भत्काएका सरकारी भवनहरुको पुनःनिर्माण अत्यन्त सुस्त देखिएको छ । भूकम्प गएको ४ वर्ष बित्दा अहिलेसम्म जम्मा २६२ वटा मात्रै सरकारी भवन पुनःनिर्माण भएका छन् । 

गोरखा भूकम्पले क्षति पुगेका ४१५ सरकारी भवन बनाउनुपर्ने तथ्याङ्क छ । १४५ भवन पुनःनिर्माण भइरहेको छ । आठ वटा सरकारी भवन पुनःनिर्माणको काम समेत सुरु नभएको राष्ट्रि पुनर्निर्माण प्राधिकरणले जनाएको छ । 

हालसम्म ६३ प्रतिशत सरकारी भवन पुनःनिर्माण सम्पन्न भएकामा चालू आर्थिक वर्षको अन्त्य सम्ममा ७५ प्रतिशत पूरा गर्ने लक्ष्य रहेको प्राधिकरणका सहप्रवक्ता मनोहर घिमिरेले जानकारी दिए ।  

आर्थिक वर्ष २०७६÷२०७७ मा ९० प्रतिशत पुनःनिर्माण सक्ने लक्ष्य छ । आव २०७७÷२०७८ मा ४१५ वटै सरकारी भवनको पुनःनिर्माण सकिने उनले बताए । भूकम्पले १६२ सरकारी भवनमा पूर्ण र २५३ मा आंशिक क्षति पुगेको थियो ।