सुधारगृहमै मृत भेटिए एक युवक

जनकपुरधाम – जनकपुरस्थित एक सुधारगृहमा एकजना बिरामी मृत अवस्थामा फेला परेका छन्। जनकपुरधाम–४ पिडडिया माइस्थानस्थित रिलीफ नेपाल नामक सुधारगृहमा सर्लाही इश्वरपुर नगरपालिका–५ फुलजोरका ४५ वर्षीय राजन घिमिरेको शव झुण्डिएको अवस्थामा मंगलबार राति फेला परेको हो। मानसिक रोगी रहेका राजनले आत्महत्या गरेको सुधारगृहको दाबी छ।

सुधार गृहभित्रै राजनको शव झुण्डिएको अवस्थामा भेटेपछि आफन्तले जनकपुर अञ्चल अस्पताल नजिक जलान मेडिकल हलमा तोडफोडको प्रयास गरेका छन्। सुधारगृह सञ्चालक मध्येका डा.शिरीष अर्याल जलान मेडिकल हलमा बिरामी जेकजाँच गरिरहेको अवस्थामा दुई दर्जनभन्दा बढीको संख्यामा रहेका आफन्तले तोडफोड तथा कुटपिटको प्रयास गरेका हुन्।

आक्रोशमा रहेका राजनका आफन्तहरुले जलान मेडिकल हलमा कार्यरत रुपेश साह र सुरेन्द्र यादवलाई कुटपिट गरेको बताइएको छ। अवस्था तनावपूर्ण बन्दै गएपछि प्रहरीले स्थितिलाई नियन्त्रणमा लिएको थियो।

मानसिक रोगी राजनलाई उनका परिवारले गत आइतबार सुधारगृहमा राखेका थिए। मंगलबार राती राजन कोठाको पंखामा पासो लगाएको अवस्थामा भेटेपछि सुधारगृह प्रशासनले उनका परिवारलाई खबर गरेको थियो।

शव पोस्टमार्टमको लागि जनकपुर अञ्चल अस्पतालमा राखिएको र घटनाको विषयमा थप अनुसन्धान भइरहेको जिल्ला प्रहरी कार्यालय धनुषाले जनाएको छ।