जनकपुरधाम – लोकसेवा आयोगले प्रदेश र स्थानीय तहमा कर्मचारी भर्नाको तयारी गरिरहेको बेला प्रदेश २ सरकारले आफ्नो प्रदेशमा कर्मचारी भर्नासम्बन्धी विज्ञापन नगर्न आग्रह गरेको छ।
प्रदेश सरकार आफ्नै लोकसेवा आयोग गठन गर्न लागेको भन्दै प्रदेश २ मा कर्मचारी भर्नाको विज्ञान नगर्न मुख्यमन्त्री लालबाबु राउतले लोकसेवा आयोगसँग यस्तो आग्रह गरेका हुन्।
मुख्यमन्त्री राउतले लोकसेवा आयोगका अध्यक्षलाई मंगलबार लेखेको पत्रमा ‘प्रदेश २ मा गठन हुन लागेको प्रदेश लोक सेवा आयोगले प्रदेश र स्थानीय तहका लागि कर्मचारी भर्नाको कार्य गर्ने हुनाले प्रदेश २ को प्रदेश स्तर र १३६ स्थानीय तहको हकमा कर्मचारी भर्नासम्बन्धी विज्ञापन नगर्न’ अनुरोध गरिएको छ।
‘प्रदेश निजामती सेवा ऐनको विधेयक र प्रदेश लोकसेवा आयोग गठनसम्बन्धी विधेयक प्रदेशसभामा अन्तिम चरणमा रहेको छ। र, सरकार प्रदेश लोकसेवा आयोग गठन गर्ने तैयारीमा छ,’ पत्रमा भनिएको छ,‘यस्तो अवस्थामा प्रदेश २ मा प्रदेश स्तर र स्थानीय तहको हकमा कर्मचारी भर्नासम्बन्धी विज्ञापन नगरियोस।’
संविधानको धारा २२७ उदृत गर्दै ‘गाउँपालिका र नगरपालिकाको कर्मचारी र कार्यालयसम्बन्धी अन्य व्यवस्था प्रदेश कानून अनुसार हुने व्यवस्था छ भने प्रदेश मन्त्रिपरिषद्, गाउँ कार्यपालिका र नगर कार्यपालिकाले आफ्नो प्रशासन सञ्चालन गर्न आश्यकताअनुसार कानूनबमोजिम विभित्र सरकारी सेवा गठन तथा सञ्चालन गर्ने सक्नेछन्’ मुख्यमन्त्री राउतले लोकसेवा आयोगलाई लेखेको पत्रमा उल्लेख छ।
प्रकाशित: Dec 31, 2017| 18:23 आइतबार, पुस १६, २०७४