भैरहवा - वरिष्ठ कथाकार विजय सागरलाई यस बर्षको मैनाली कथा सम्मान प्रदान गरिएको छ । नेपाल प्रज्ञा प्रतिष्ठान कमलादीमा आयोजित विशेष कार्यक्रमका अवसरमा भैरहवा निवासी कथाकार सागरलाई नेपाल प्रज्ञा प्रतिष्ठानका प्राज्ञ गीता केशरीले सम्मान गरेका हुन् ।
कथाकार सागर नेपाली साहित्यका अग्रणी साहित्यकार हुन् । पाल्पाको तानसेनमा २००६ सालमा जन्मे हुर्केर हाल सिद्धार्थनगर भैरहवामा सक्रिय साहित्यिक गतिविधि र सामाजिक कार्यमा अगुवाइ गरिरहेका सागरका कथामा नेपाली समाजका विभिन्न पक्षलाई समेटिएको पाइने वरिष्ठ समालोचक बालकृष्ण भट्टराईले बताए । सिद्धार्थ साहित्य परिषदका पूर्वअध्यक्ष समेत रहेका सागरले कविता र लेखसमेत लेख्ने गरेका छन् । समालोचक भट्टराईका अनुसार सागरका कथा कविता सामाजिक विषयवस्तुमा आधारित प्रगतिशील चेतनाले ओतप्रेत र ऐतिहाससक खोजमा केन्द्रित हुने गरेका छन् ।
चौतारो (हवाई पत्र) लघुकथा संग्रह भाग १ र २ (२०३४), सागरका कथाहरु (२०६०) र सागरका कविताहरु (२०६१), विवरुका कथाहरु (२०६६), नेवाः सस्कृति र उपत्यका बाहिर बस्ने नेवारहरु (२०६६) सागरका प्रकाशित कृति हुन् । विवरुका कथाहरु कथाकार सागरले वनमाली निराकार र रुद्र ज्ञवालीसंगको सहलेखनमा लेखेका थिए । यसैगरी हवाईपत्र पनि उनको सहलेखन कृति हो ।
साहित्य सिर्जना र सामाजिक सेवामा सक्रिय सागर हाल लुम्बिनी क्षेत्रमा भ्रष्टाचार, बेथिति, कुरीति र कुसंस्कारविरुद्ध बिएमजी ग्रुप स्थापना गरी नागरिक आन्दोलनको अगुवाइ गरिरहेका छन् ।
प्रकाशित: Dec 31, 2017| 18:23 आइतबार, पुस १६, २०७४