नेपाली महिला फुटबल वरीयता एक स्थान खस्कियो

काठमाडौं- नेपाली महिला फुटबलको फिफा वरियता एक स्थान खस्किएको छ। विश्व फुटबलको सर्वोच्च निकाय फिफाले शुक्रबार सार्वजनिक गरेको विवरणअनुसार नेपाली महिला फुटवल फिफा वरियतामा एक स्थान तल झरेको हो। 

फिफाको नयाँ महिला फुटवल वरियताअनुसार नेपाल १०१औं स्थानमा छ। यसअघि नेपालको वरीयता १००औं स्थानमा थियो। 

फिफाले सार्वजनिक गरेको वरीयताअनुसार शीर्षस्थानमा अमेरिका छ भने दोस्रो स्थानमा स्विडेन छ।

त्यस्तै, जर्मनी, नेदरल्यान्ड र फ्रान्स क्रमशः तेस्रो, चौथो र पाँचौँ स्थानमा छन्। क्यानडा वरियताको छैटौं स्थानमा छ। सन् २०२१ अगस्ट ८ मा सम्पन्न टोकियो ओलम्पिकमा स्विडेनलाई हराउँदै क्यानडाले पहिलो पटक ओलम्पिक स्वर्ण जितेको थियो।