घुस लिदैँ गर्दा बिचौलीयासहित श्रमका कर्मचारी पक्राउ

जनकपुरधाम- प्रहरीले जनकपुरस्थित श्रम कार्यालयबाट बिचौलियासहित एक कर्मचारीलाई नियन्त्रणमा लिएको छ । श्रमस्वीकृति दिलाउन सेवाग्रहीसँग पैसा घुस लिएको आरोपमा प्रहरीले कार्यालयमा कार्यरत एक कर्मचारीसति बिचौलियालाई पक्राउ गरेको हो ।

पक्राउ पर्नेमा कार्यालयमा कार्यरत करार कर्मचारी धनुषा लक्ष्मिनिया–५ का सरोजकुमार यादव तथा बिचोलियाको काम गर्दै आइरहेका धनुषा कमला नगरपालिका–३ का रामभगत यादव र जनकपुरधाम–१६ का अजय साह रहेको प्रहरीले जनाएको छ ।

पक्राउ परेका यादव र साहले लाइनमै नबसी छिटो श्रमस्वीकृति दिलाइदिने भन्दै एक सेवाग्राहीसँग १३ हजार रुपैयाँ घुस लिएका थिए । प्रहरीले जनाएअनुसार यादवसहितका व्यक्तिहरुले सेवाग्राहीबाट पैसा लिएरपनि श्रमस्वीकृति दिलाउन नसकेपछि यो रहस्य बाहिरिएको हो ।
 
श्रमस्वीकृति पाउन नसकेपछि आफूले दिएको पैसा फिर्ता माग्दा उनीहरुले उल्टै सेवाग्राहीलाई हातपात गरेको जिल्ला प्रहरी कार्यालय धनुषाले जनाएको छ । पीडित सेवाग्राहीले जिल्ला प्रहरी कार्यालयमा दिएको उजुरीको आधारमा उनीहरुलाई पक्राउ गरिएको जनाइएको छ ।

सेवाग्राहीबाट असुल गरेको पैसा यादव र साहले कार्यालयका कर्मचारीमारीमअ सरोजलाई बुझाएर काम गराउँदै आएकोे प्रहरी अनुुुसन्धानबाट खुलेको छ । पक्राउ परेका तीनै जनाविरुद्ध सार्वजनिक हितविरुद्धको कसुरमा मुद्दा दर्ता गरी आवश्यक अनुसन्धान भइरहेको प्रहरीले जनाएको छ ।
 
केहि दिनअघिमात्र जनकपुरमा स्थापना भएको प्रदेश श्रम कार्यालयमा कर्मचारी र बिचौलियाहरुको मिलमतोमा सेवाग्राहीलाई अनावश्यक दुःख दिने गुनासो आउने गरेको छ । घन्टौ लाइनमा बसेका सेवाग्राहीले आफ्नो काम गराउन कठिनाइ भेल्दै आइरहेपनि बिचौलियासँग सेटिङ्ग गरेकाहरुको काम तत्काल हुने गरेको पीडित सेवाग्राहीहरु बताउँछन् ।