काठमाडौं- ओलम्पिक छनोटको दोस्रो चरणको पहिलो खेलमा नेपालले आज (बुधबार) म्यानमारसँग प्रतिस्पर्धा गर्दैछ । खेल नेपाली समय अनुसार बेलुका ५ः१५ बजे सुरु हुने छ ।
घरेलु टोलीविरुद्व मैदान उत्रिदा नेपाली टिमले लक्ष्य कम्तीमा बराबरीको नतिजा हुने छ । खेल अघि प्रशिक्षक हरि खड्काले म्यानमारसँग जित वा बराबरीको नतिजाको लागि खेल्ने बताएका थिए ।
ओलम्पिकको पहिलो चरणको खेलमा नेपालले म्यानमारलाई १-१ को बराबरीमा रोकेको थियो । पहिलो पटक म्यानमारसँग भिडेको नेपालले खेलको सुरुवातमै सावित्रा भण्डारीको गोल मार्फत अग्रता लिएपनि त्यसलाई जोगाउन सकेन ।
यस्तै भारतले आयोजना गरेको हिरो गोल्डकपमा नेपालले समुह चरणमा म्यानमारसँग ३-० को हार व्यहोरेको थियो । म्यानमारसँग नै भएको उक्त प्रतियोगिताको फाइनल खेलमा नेपालले ३-१ को हार व्यहोरेको थियो ।
नेपालले आफ्नो दोस्रो खेलमा चिरपरिचित भारतसँग चैत्र २३ गते खेल्नेछ । प्रतियोगिताको अन्तिम खेलमा नेपालले नयाँ प्रतिद्वन्दी इन्डोनेसियासँग २६ गते खेल्नेछ । साफ च्याम्पियनसिपमा मात्रै सिमित नेपाली महिला टिम पहिलो पटक ओलम्पिक छनोट खेलेको हो ।
प्रकाशित: Dec 31, 2017| 18:23 आइतबार, पुस १६, २०७४