भारतका विदेश सचिव किन आउँदैछन् नेपाल ? 

काठमाडाैं- भारतका विदेश सचिव विजय गोख्ले नेपालको दुई दिवसीय औपचारिक भ्रमणमा आज बिहीबार काठमाडौँ आउँदैछन्। नेपालको पछिल्लो राजनीतिक घटनाक्रमका विषयमा बुझ्नका लागि गोख्ले नेपाल आउन लागेका हुन् । 

 उनले आफ्ना नेपाली समकक्षी शङ्करदास वैरागीसँग भारत–नेपाल सम्बन्धका सबै पक्षमा विचार विमर्श गर्ने जनाइएको छ। उनले आफ्नो दुई दिने भ्रमणका क्रममा प्रधानमन्त्री केपी शर्मा ओली र परराष्ट्रमन्त्री प्रदीपकुमार ज्ञवालीसँग छुट्टा छुट्टै भेट्ने कार्यतालिका तय भएको छ । 

करीब १५ महीनाअघि विदेश सचिवमा नियुक्त गोख्लेको यो पहिलो औपचारिक भ्रमण हो। भारतको विदेश सचिवमा नियुक्त भएपछि पारस्परिक विषयमा छलफल गर्न नयाँ दिल्लीबाट उच्च कूटनीतिक अधिकारीले नेपाल भ्रमण गर्ने परम्परा छ। 

दुई सचिवको नेतृत्वमा बिहीबार नै द्विपक्षीय वार्ता हुनेछ । सचिव गोख्लेका साथ सहसचिव सुधाकर दलेला पनि भ्रमण दलमा सहभागी छन्।