नेपाल र जापानबीच श्रम सम्झौतामा हस्ताक्षर

काठमाडाैं - नेपाल र जापानबीच नेपाली कामदार लाने विषयमा आज श्रमिक आपूर्ति सम्बन्धी सहकार्यको समझदारी (एमओसी) मा हस्ताक्षर भएको छ। ललितपुरको कुपण्डोलस्थित हिमालयन होटलमा आयोजित कार्यक्रममा नेपालका तर्फबाट श्रम, रोजगार तथा सामाजिक सुरक्षा मन्त्रालयका निमित्त सचिव रामप्रसाद घिमिरे र नेपालका लागि जापानी राजदूत मासामिचि साइगोले समझदारी पत्रमा हस्ताक्षर गरेका हुन्।

कार्यक्रममा बोल्दै श्रम, रोजगार तथा सामाजिक सुरक्षा मन्त्री गोकर्ण विष्टले जापान नेपालका लागि आकर्षक गन्तव्य मुलुक भएको र रोजगार लागि जापान जाने नोपलीको चाहना पुरा हुने भएको बताए। उनले जापानसँगको यस सम्झौतालाई सुखद क्षण भएको बताए। उनले यसका लागि जापान सरकारलाई धन्यवाद व्यक्त गरे।

जापानले कृषि, मत्स्यपालन, औद्योगिक, होटल, रेष्टुरेन्ट, पर्यटन लगायत १४ क्षेत्रमा नौ देशका श्रमिक लैजाने नीति अनुसार नेपालसँग श्रम सम्झौता गरेको हो। जापानले आगामी पाँच बर्षमा तीन लाख ४५ हजार विदेशी कामदार लैजाने तयारी गरेको छ । तिमध्ये नेपाली कामदार कति हुने भन्ने विषयमा छलफल हुन बाँकी नै रहेको छ । आगामी अप्रिल महिनादेखि नै कामदार छनोट गर्ने प्रक्रिया सुरु हुने बताइएको छ। जापान लैजानुअघि दक्ष तथा अर्धदक्ष कामदारको जापानी भाषा र सीप परीक्षण गरिने भएकाे छ।