विराटनगर- पाँचौ संस्करणको साफ महिला च्याम्पियनसिपको उपाधी भिडन्तमा नेपाल र भारतले पहिलो हाफमा बराबरी खेलेको छ । उपाधिका लागि शुक्रबार शहिद रंगशालामा भएको खेलमा दुबै टोलिले पहिलो हाफ १-१ को बराबारी खेलेका हुन ।
निकै नै आक्रमक बनेको खेलको २६ औं मिनेटमा भारतका लागि डालिमा छिब्बरले गोल गर्दै सुरुवाती अग्रता दिलाई । नेपाली खेलाडीले प्रतिद्वन्दी खेलाडीलाई फाउल गरे पछि करिब ३० याडमा पाएको फ्री-किक प्रहारमा डालिमाले सहजै बललाई जाली चुमाइन ।
तर, भारतको अग्रता लामो समय टिक्न सकेन । भारतले अग्रता लिएको ७ मिनेटमा नबित्दै नेपालकी स्ट्राइकर सावित्रा भण्डारिले गोल गर्दै खेल बराबरीमा ल्याइन । उनले गिता रानाको लामो एयर बलमा हेडरमार्फत गोल गर्दै खेल बराबरीमा ल्याइन ।
यस अघि १३ औं मिनेटमा सावित्रा भण्डारिले दिएको पासमा मन्जली कुमारी योन्जनले हरेको प्रहारलाई भरतकी गोलरक्षक अदिती चौहानले सहजै बचाईन । त्यस्तै १७ औं मिनेटमा भारतकी ग्रेस डङ्ग्मेइले दिएको ब्याक पासमा सन्जुले डिबस्क लाइनबाट गतेको प्रहार गोलरक्षक एन्जिला तुम्बापो सुब्बले सहजै बचाउ गरिन ।
१९ औं मिनेटमा कप्तान निरु थापाको पासमा भारतको एक डिफेन्डरलाई बिट गर्दै डिबक्स भित्रबाट गरेको प्रहार आकासिदा नेपाल अग्रता लिनबाट चुक्यो । २३ औं मिनेटमा अनिता बस्नेतको लामो पासमा सावित्राको प्रहारलाई गोलरक्षक अदितिले सहजै बचाइन । इन्जुरी समयमा अनिताको लामो पासमा सावित्राले गोल गर्ने सुनौलो अवसर खेरफालीन् ।
प्रकाशित: Dec 31, 2017| 18:23 आइतबार, पुस १६, २०७४