बार्सिलोनाले युनाइटेड र युभेन्ट्सले आयाक्सको सामना गर्ने

एजेन्सी- युरोपको प्रतिष्ठित फुटबल प्रतियोगिता युइएफए च्याम्पियन्स लिग फुटबलको क्वाटरफाइनल चरणको ड्र शुक्रबार सार्वजनिक गरेको छ । ड्र अनुसार स्पेनिस क्लब बार्सिलोनाले इंग्लिस क्लब म्यानचेस्टर युनाइटेडको सामना गर्ने भएको छ । 

त्यस्तै लिगको अर्को दाबेदार टोली इटालियन क्लब युभेन्ट्सले आयाक्सको सामना गर्नेछ । पछिल्लो सिजन उपविजेतामा सिमित भएको लिभरपुलले पोर्चुगिज क्लब एफसी पोर्टोसँग खेल्नेछ । अर्को खेलमा दुई इंग्लिस टोली आमने-सामने हुँदैछन् । टोटेनहम हट्सपर र म्यानचेस्टर सिटीले एकआपसमा खेल्नेछन् । 

बार्सिलोनाले लियोनलाई पराजित गर्दै शीर्ष आठमा स्थान बनाएको हो भने युनाइटेडले पेरिस सेन्ट जर्मेन (पिएसजी)लाई पराजित गरेको थियो । युभेन्ट्सले एटलेटिको म्याड्रिडलाई हराउँदै अन्तिम ८ मा स्थान बनाएको थियो । 

आयाक्स साविक विजेता रियल म्याड्रिडलाई पराजित गर्दै क्वाटरफाइनल पुगेको थियो । लिभरपुलले जर्मन च्याम्पियन बायर्न म्युनिख र पोर्टोले एएस रोमालाई हराएका थिए । त्यस्तै टोटेनहमले बोरुसिया डर्टमुन्ड र सिटीले साल्केलाई पराजित गरेका हुन् ।

यससँगै प्रतियोगिताको सेमिफाइनलको ड्र पनि सार्वजनिक भएको छ । टोटेनहम र सिटीको विजेताले आयक्स र युभेन्ट्सको विजेतासँग खेल्नेछ । बार्सिलोना र युनाइटेडबीच खेलको विजेताले लिभरपुल र पोर्टोको खेलको विजेतासँग फाइनल प्रवेशका निम्ति प्रतिस्पर्धा गर्नेछन् ।

क्वाटरफाइनलको पहिलो लेग अप्रिल ९र१० मा हुनेछ । यस्तै दोस्रो लेग १६/१७ अप्रिलमा हुनेछ ।