शुक्रबार उपत्यकामा सडक डिस्टर्ब हुने भन्दै बैकल्पिक बाटो प्रयोग गर्न राप्रपाको आग्रह

काठमाडौं - राष्ट्रिय प्रजातन्त्र पार्टीको २ साता लामो मेची महाकाली राष्ट्रिय स्वाभिमान यात्रा शुक्रबार समापन हुँदैछ। काठमाडौंको भृकुटीमण्डपमा  हुने एक कार्यक्रमकाबीच यात्रा समापन हुन लागेको हो।

समापन समारोह अघि बिहान स्वाभिमान यात्रा ललितपुरबाट सुरु हुँदै भक्तपुर पुग्ने र त्यहाँबाट पुनः काठमाडौं फर्कने राप्रपाले जानकारी दिएको छ। यात्रा गत फागुन १५ गते ताप्लेजुङ्बाट सुरु भएको थियो।

यसैबीच राप्रपाले  मेची महकाली अभियानको शुक्रबार राजधानीमा समापन हुने कार्यक्रममा केही सडकहरु डिस्टर्ब हुने भन्दै त्यस दिनका लागि बैकल्पिक राजमार्ग प्रयोग गर्न आग्रह गरेको छ। सो पार्टीका प्रचार बिभाग प्रमुख मोहन श्रेष्ठले बिहीबार एक बिज्ञप्ति  प्रकाशित गर्दै यस्तो आग्रह गरेका हुन् । 

चैत्र १ गते विहान ७ः३० बजेबाट नै लावालस्कर स्वाभिमान यात्रा ललितपुरबाट प्रारम्भ भई भक्तपुर पुग्नेछ। यात्रा भक्तपुरबाट काठमाण्डौ फर्केर शहरका विभिन्न स्थान हुँदै डिल्लीबजारमा हुने कलश यात्रा सहित भृृकुटिमण्डपमा आमसभामा परिणत हुनेछ। यात्रा सञ्चालन हुने देहायका रुटहरुमा केही समय सवारी आवागमनमा बाधा उत्पन्न हुन सक्ने भएकाले सो पार्टीले क्षमा याचना गर्दै वैकल्पिक रुट प्रयोग गर्न अनुरोध गरेको छ। 

शुक्रबार बिहान ७ः३० बजे जावलाखेलबाट कुमारीपाटी–लगनखेल–सातदोबाटो–ग्वार्को– कोटेश्वर–जडिबुटी – लोकन्थली – गठ्ठाघर – पुरानोबाटो गठ्ठाघर व्यारेक – पुरानो ठिमी–सल्लाघारी – नगरकोट जाने बाटो हुँदै व्यासी – कमलविनायक – च्यामासिंह – जगाती–सुर्यविनायक चोक – सल्लाघारी – नयाँठिमी – गठ्ठाघर – लोकन्थली – जडिबुटी – कोटेश्वर–तिनकुने– सिनामंगल – पुरानोवानेश्वर – मैतीदेवी– डिल्लीबजार–पुतलीसडक–बागबजार–रत्नपार्क–विद्युत प्राधिकरण हुँदै प्रदश नीमार्ग, भृकुटिमण्डपमा आएर आम सभामा परिणत हुने सो पार्टीले जनाएको छ।