जनकपुरधाम - बेलुनमा भर्ने ग्यास सिलिन्डर विष्फोट हुँदा मिथिला मध्यमा परिक्रमामा सहभागी २ जना घाइते भएका छन्। घाइते हुनेमा महोत्तरी औरही नगरपालिका बस्ने अन्दाजी ४० वर्षका खेलौना व्यवसायी उपेन्द्र कापड र गौशाला नगरपालिका बस्ने ५१ वर्षीय अविरुद्धिन चुरेटे रहेको प्रहरीले जनाएको छ। १५ दिने मिथिला मध्यमा परिक्रमा महोत्तरीको कञ्चनवनबाट धनुषाको पर्वतातर्फ हिँड्नै लाग्दा बिहीबार बिहान ग्यास सिलिन्डर विष्फोट भएको बताइएको छ।
विष्फोटमा परि घाइते भएका दुबैजनालाई उपचारको लागि जनकपुर अञ्चल अस्पतालमा भर्ना गरिएपनि कापडको अवस्था गम्भीर रहेकोले थप उपचारको लागि बाहिर रेफर गरिएको छ। कापडको देब्रे खुट्टामा गम्भीर चोट लागेको उपचारमा संलग्न चिकित्सकहरुले बताएका छन ।
मेलाहरुमा खेलौनाका व्यवसाय गर्दै आएका कापडले धनुषाको पर्वता पुग्न सबै समान ठिक पारिसकेपछि पानी छर्केर ग्यास सिलिन्डर चिसो पार्न खोज्दा अचानक विष्फोट भएको बताइएको छ।
प्रकाशित: Dec 31, 2017| 18:23 आइतबार, पुस १६, २०७४