किन जनकपुर आउँदै छन् सिके राउत ?

जनकपुरधाम- सिके राउत आज जनकपुर आउने भएका छन् । शुक्रबार सरकारसँग ११ बुँदे सहमति गरेका राउत सहमतिपछि पहिलो पटक जनकपुर आउन लागेका हुन् ।

राउतको आज अपरान्ह १२ बजे जहाजबाट जनकपुर आउने कार्यक्रम रहेका उनका सहयोगी रामशंकर महासेठले जानकारी दिएका छन् । यसअघि स्वतन्त्र मधेशको अभियान चलाएका राउत सरकारसँग ११ बुँदे सहमति गरेर मूलधारको राजनीतिमा अवतरण गरेका छन् ।

जनकपुर पुगेपछि राउत समर्थकहरुले विमानस्थलबाट र्‍याली निकाल्ने तयारी गरेको बताइएको छ । राउतको रिहाइ र सरकार सम्झौता गर्न बाध्य भएको भन्दै ¥याली निकाल्ने तयारी गरिएको उनी निकट कार्यकर्ताहरुले बताएका छन् ।

११ बुँदे सहमति गर्दै सरकारले जनमतसंग्रह गर्ने प्रतिवद्धता जनाएको राउतलगायत उनका समर्थकहरुको दाबी छ । यद्यपी प्रधानमन्त्री केपी शर्मा ओलीले विखण्डनको अध्याय समाप्त भइसकेको राउतसँग सहमति गर्न आयोजना गरिएको घोषणा सभामा समेत स्पष्ट पारिसकेका छन् ।

पछिल्लो पाँच वर्षदेखि अलग मधेश राज्यको अभियानमा लागेका राउत पाँच महिनाको कारवासपछि अचानक प्रधानमन्त्री ओलीसँग राष्ट्रिय सभागृहमा उदाएका थिए ।