युभेन्ट्सको सहज जित, शीर्ष स्थान कायमै

एजेन्सी- इटालियन सिरी ‘ए’ लिग फुटबलमा युभेन्ट्सले शीर्ष स्थान कायमै राखेको छ । शुक्रबार राति आफ्नो स्टार खेलाडी क्रिस्टियानो रोनाल्डोविना मैदान उत्रिएको युभेन्ट्सले उडीनेसलाई ४-१ को फराकिलो गोल अन्तरले पराजित गर्दै शीर्ष स्थान कायमै रखेको हो ।

घरेलु मैदानमा युभेन्ट्सको जितका लागि मोइसे किनले दुई गोल गरे । इम्री क्यान र ब्लेइस माटुइड़ीले एक एक गोल गर्दा उडीनेसका लागि केभिन लासङ्गाले एक गोल फर्काएका थिए ।

पहिलो हाफमा २-० को अग्रता बनाएको युभेन्ट्सले दोस्रो हाफमा थप दुई गोल गर्दै एक गोल खान पुगेको थियो । खेलको ११ औं मिनेटमा मोइसे किनले गाले गर्दै घरेलु टोलीलाई सुरुवाती अग्रता दिलाए । 

३९ औं मिनेटमा मोइसले व्यक्तीगत दोस्रो गोल गर्दै युभेन्ट्सलाई पहिलो हाफमा २-० को अग्रता दिलाएका हुन् । खेलको ६७ औं मिनेटमा इम्री क्यानले पेनाल्टीमा गोल गर्दै अग्रता तेब्बर पारे । 

७१ औं मिनेटमा ब्लेइसले गोल गर्दै युभेन्ट्सको अग्रता ४-० को बनाए । ८४ मिनेटमा उडीनेसका केभिनले गोल गर्दै खेलका फर्किने प्रयास गरेका थिए । तर, थप गोल हुन नसक्दा खेल युभेन्ट्सले ४-१ ले जितेको हो । 

यस जितसँगै युभेन्ट्सले लिगमा १९ अंकको अग्रता बनाएको छ । युभेन्ट्सले २७ खेलबाट ७५ अंक जोडेको छ । दोस्रो स्थानको नेपोलीको २६ खेलबाट ५६ अंक छ । पराजित उडिनेस २५ अंकसहित १५ औं स्थानमा छ  ।