ताप्लेजुङ - राष्ट्रिय प्रजातन्त्र पार्टीका अध्यक्ष कमल थापाले धर्म परिवर्तन नरोकिए नेपालमा हिन्दु, बुद्धिस्ट र किरात अल्पमतमा पर्ने चेतावनी दिएका छन् । ताप्लेजुङको फुङलिङमा बुधबार मेची महाकाली राष्ट्रिय स्वाभिमान यात्रा शुभारम्भ गर्दै उनले यस्तो चेतावनी दिएका हुन् ।
‘माओवादीलाई शान्ति प्रक्रियामा ल्याउने नाममा नेपालीले हिन्दु राष्ट्र गुमाए, राजसंस्था गुमाए, फेरि विद्रोहको कुरा अस्वीकार्य छ’, थापाले भने, ‘१२ वर्षको अवस्थालाई दृष्टिगत गर्दै परम्परागत शक्ति र परिवर्तनकारी शक्तिका बीचमा सामन्जस्य कायम गर्नुपर्छ ।’
देश अभिभावकविहीन भएको दाबी गर्दै थापाले भने, ‘राजादेखि सबै राजनीतिक शक्ति अटाउने मौलिक प्रजातन्त्रका लागि गोलमेच सम्मेलन गरौं ।’
संघीयता मुलुकले थेग्न नसक्ने अवस्थामा पुगेको र जनताको प्रत्यक्ष अभिमतबिना लागू गरिएको संघीयताबारे जनमत संग्रह गरिनुपर्ने उनले बताए । उनले भने, ‘दोहोरो तेहोरो करबाट जनतालाई मुक्ति दिलाउन अविलम्ब पहल गरियोस् ।’
प्रकाशित: Dec 31, 2017| 18:23 आइतबार, पुस १६, २०७४