नेपाल-भारत उर्जा विज्ञको बैठक बस्दै, पञ्चेश्वर प्राथमिकतामा

काठमाडौं- नेपाल र भारत जल तथा उर्जा विज्ञहरुको संयुक्त तेस्रो बैठक बुधबारदेखि सुरु हुँदैछ । बैठकमा दुई देशको हितमा हुने गरि जलस्रोतको उपयोग कसरी गर्ने भन्ने विषयमा छलफल हुने बताइएको छ ।

बैठकमा पञ्चेश्वर बहुउद्धेश्यिय आयोजनाको कार्यान्वयनका विषयमा पनि छलफल हुने भएको छ । सो बैठकमा नेपालले पेश गर्ने एजेन्डाका विषयमा जल तथा उर्जा आयोगको सचिवालयले मंगलबार प्रधानमन्त्रीलाई जानकारी गराएको थियो । 

प्रधानमन्त्री केपी शर्मा ओलीले देशको हितका पक्षमा खुलेर आफ्ना कुरा राख्न  र त्यस अनुसारको तयारी गर्न प्रधानमन्त्रीले निर्देशन दिएका थिए । प्रधानमन्त्री ओलीले २३ बर्ष अघि महाकाली सन्धी अनुसार नेपालले चाँदनी–दोधारा क्षेत्रमा पाउनु पर्ने १० घन मिटर प्रति सेकेण्ड (३५० क्यूसेक) पानी हालसम्म नपाएकोले यस बिषयलाई गम्भिरताका साथ उठाउनु पर्ने बताएका थिए । 

२०५२ माघ १९ गते भएको महाकाली सन्धीको धारा ४ अनुसार नेपालको चाँदनी–दोधारा क्षेत्रको सिंचाइका लागि भारतले १० घन मिटर प्रति सकेण्ड पानी उपलब्ध गराउने सम्झौतालाई कार्यन्वयन गराउने भारतलाई तत्पर गराउनु पर्ने प्रधानमन्त्री ओलीको भनाइ छ ।