काठमाडौं- समायोजन प्रक्रियामा असहमति जनाउँदै सरकारी चिकित्सकहरूले देशभरका अस्पताल ठप्प पारेका छन् । सरकारले अपमानित गरिकाले समायोजन गर्न खोजेको भन्दै उनीहरुले शुक्रबार आकस्मिकबाहेकका सबै सेवा ठप्प पारेका हुन् ।
सरकारी चिकित्सक संघ नेपाल गोदानले विज्ञप्तिमार्फत सरकारले आफ्नो कदम नसच्याएसम्म आफुहरुको आन्दोलन नरोकिने जनाएको छ ।
समायोजनका विषयमा आफूहरूको असन्तुष्टि सम्बोधनका लागि पटकपटक सरकारसँग छलफल गरे पनि माग सम्बोधन नभएपछि शुक्रबार आकस्मिकबाहेकका सम्पूर्ण सेवा ठप्प पारेर आन्दोलनमा उत्रिन लागेको सरकारी चिकित्सक संघ गोदानका महासचिव डा. रविन खड्काले जानकारी दिए।
गोदानको आह्वानमा काठमाडौं उपत्यकाका चिकित्सकहरुले शुक्रबार बिहान १० बजे वीर अस्पतालबाट र्याली निकालेर माइतीघर मण्डलामा कोडसभा गर्ने तयारी गरेका छन् । चिकित्सकहरुको आन्दोलनका कारण विरामीको भने विचल्ली भएको छ । बिहानै ओपीडीको टिकट लिन आएका विरामी र उनीहरुका आफन्त निराश भएका छन् ।
यसैबिच, सरकारी चिकित्सकहरुले समाजोजनका विषयमा सरकारले गरेको निर्णय नसच्याए सामुहिक राजीनामा दिने तयारी गरेका छन् । त्यसका लागि उनीहरुले हस्ताक्षर संकलन अभियान सुरु गरेका छन् ।
प्रकाशित: Dec 31, 2017| 18:23 आइतबार, पुस १६, २०७४