काठमाडौं- नेपाली कांग्रेसका नेता गगन थापाले संसद् छलेर अध्यादेश ल्याउनु गलत भएको टिप्पणी गरेका छन्।
सामाजिक सञ्जाल ट्वीटरमा उनले लेखेका छन्, 'संसद् अधिवेशन हठात अन्य गरेर संसद् छल्दै अध्यादेश ल्याउनु गलत! हिजो गलत, आज गलत, सधैं गलत, जसले गरे पनि गलत।'
हिजो ओलीले ल्याउँदा गलत भन्ने, त्यसको विरुद्धमा उभिने कसैलाई पनि आज समर्थन गर्ने हक नरहेको उनको टिप्पणी छ। समर्थन गर्ने भए त्यतिवेला विरोध गरेकोमा सार्वजनिक माफी माग्नु पर्ने नेता थापाले बताए।
'गत वर्ष वैशाखमा यसरी नै संसद् छल्दै अध्यादेश जारी गर्ने ओली सरकार, समर्थन गर्ने मण्डली वा अध्यादेशमा ल्याप्चे लगाउने राष्ट्रपति कसैलाई पनि आज यो अध्यादेशको विरोध गर्ने हक छैन/हुँदैन। विरोध गर्ने भए त्यतिवेला गल्ती गरेका थियौं भनेर पहिला सार्वजनिक माफी माग्नुपर्छ', उनले भनेका छन्।