माधव नेपालले भने- 'सरकारले जनताको भावनाअनुसार काम गर्नै सकेन’

जनकपुरधाम- पूर्वप्रधानमन्त्री एवं नेकपाका वरिष्ठ नेता माधवकुमार नेपालले सरकारलाई फेरी कटाक्ष गरेका छन् । सरकार विधिको शासनअनुसार चल्न नसकेको भन्दै नेता नेपालले सरकारको आलोचना गरेका हुन्।

जनकपुर विमानस्थलमा बुधबार सञ्चारकर्मीहरुसँग कुराकानी गर्दै नेता नेपालले एक वर्ष पुरा गरिसकेको सरकारले स्वयं मूल्यांकन गर्ने बेला आइसकेको बताए। ‘सरकारको काम कारबाहीबाट जनता खुशी देखिएका छैनन्,’ नेपालले भने,‘सरकारले आफ्नो कामकाजको समीक्षा गर्नु जरुरी अछि।’

पार्टी सञ्चालनको प्रक्रियाप्रति समेत नेता नेपाल असन्तुष्ट देखिएका छन् । ‘पार्टी नीतिको हिसाबले चल्नुपर्ने हुन्छ,’ नेपालले भने,‘ तर पार्टी व्यक्तिको हिसाबले चलेको छ।’ ‘पार्टीलाई व्यक्तिले चलाइ रहेका छन्,’ नेपालले भने,‘’कम्युनिस्ट प्रणालीमा देउता मानिँदैन। कसैले आफूलाई देउता नठाने हुन्छ।’

दुई पार्टीको एकतामा भइरहेको ढिलाइका कारण कार्यसम्पादनसमेत प्रभावित भएको उनको भनाइ थियो । कार्यसम्पादनलाई तिव्रता दिन यथाशीघ्र एकता प्रक्रिया टुंग्याउन नेपालले नेतृत्वलाई सुझाव दिएका छन्।