सञ्‍चारमन्‍त्रीको 'टर्चर'पछि निकिताले दिइन राजीनामा

काठमाडौँ- चलचित्र विकास बोर्डका अध्यक्ष निकिता पौडेलले आफ्नो पदबाट राजीनामा दिएकी छिन् । पौडेलले बुधबारदेखि लागू हुने गरी मंगलबार सञ्चार तथा सूचना प्रविधिमन्त्री गोकुलप्रसाद बाँस्कोटासमक्ष राजीनामा पत्र बुझाएकी हुन् ।  

उनले भनिन्, “मैले बुधबारदेखि लागू हुने गरी राजीनामा दिएकी हुँ ।” पौडेलले आफूले आफ्नो पदबाट राजीनामा दिएको र आगामी दिनमा समाज सेवामा समर्पित हुने बताइन । उनी २०७४ साल मङ्सिर २५ गते बोर्डको अध्यक्षमा नियुक्त भएकी थिएन । 

पौडेलले पहिलो पटक बक्स अफिस प्रणालीको शुरुआत गरेको र अन्य केही सकारात्मक कामको समेत थालनी गरेको आफ्नो राजीनामापत्र उल्लेख गरेकी छिन् । 

सञ्चारमन्त्री बास्कोटाको ठाडो  निर्देशनमा चार दिन अघि उनलाई स्पष्टिकरण सोधिएको थियो । चौमासिक समीक्षा बैठकका लागि पत्राचार गर्दा पनि अनुपस्थित भएको र बोर्डको काम सन्तोषजनक नरहेको भन्दै स्पष्टिकरण सोधिएको थियो । 

पौडेलले हालै सञ्चारकर्मी रवि लामिछानेसँग कोर्ट म्यारिज गरेकी छन् । उनी त्यो अवधीमा लामो समय विदामा बसे पनि विदा स्वीकृत नगराएको मन्त्रालयका अधिकारीहरुले मन्त्रीलाई जानकारी दिएका थिए । त्यपछि थप आक्रोशित बनेका मन्त्री बाँस्कोटाले लिखित स्पष्टिकरण सोध्न निर्देशन दिएका थिए । 

त्यसअघि पनि मन्त्री बाँस्कोटलाले निकितालाई विभिन्न बाहाना टर्चर दिने गरेको स्रोतको दावी छ । निकितालाई ओली सरकारले पदबाट बर्खास्त गरेपनि सर्वोच्च अदालतले पुर्नबहाली गराएको थियो ।