नेपालमा एकदिवसीय र टी-२० अन्तर्राष्ट्रिय सिरिज हुँदै

काठमाडौं- नेपालमा पहिलोपटक एकदिवसीय र टी-२० सिरिज हुने भएको छ । नेपाली राष्ट्रिय टोलीले एकदिवसीय मान्यता पाएपछि पहिलोपटक टी-२० सिरिज हुन लागेको हो । नेपालले २०१९ भित्र एकदिवसीय होम सिरिज आयोजना गर्नैपर्ने प्रावधान छ । 

त्यसैले नेपाल एकदिवसीय अन्तर्राष्ट्रिय र टी-२० अन्तर्राष्ट्रिय आयोजना गर्ने तयारीमा जुटेको छ । तर, प्रतियोगिता कुन राष्ट्रसँग र कहिले हुने भन्ने टुंगो  लागेको छैन । 

अन्तर्राष्ट्रिय क्रिकेट परिषद् (आइसिसी) ले क्रिकेट मैदानको भौतिक पूर्वाधार तथा पिचको अवस्था अध्ययन गर्न ‘पिच कन्सल्टेन्ट एन्डी एट्किन्सन’ लाई काठमाडौं पठाएको छ । टोलीले मंगलबार मैदानको भौतिक पूर्वाधार अध्ययन गरिसकेको छ ।

केही दिनअघि काठमाडौं आएको टोलीले मूलपानीस्थित क्रिकेट मैदान र त्रिवि क्रिकेट मैदानको निरीक्षण गरेको हो । टोली बुधबार फर्किने आइसिसीकी नेपाल प्रतिनिधि भावना घिमिरेले जानकारी दिइन् । 

उनले भनिन्, ‘आइसिसी टोलीले काठमाडौंका दुई क्रिकेट मैदान मूलपानी र त्रिवि क्रिकेट मैदानको निरीक्षण गरिसकेको छ । अब टोलीले आइसिसीलाई मैदान र पिचको अवस्थाबारे प्रतिवेदन पेस गर्नेछ ।’ उक्त रिपोर्टका आधारमा आइसिसीले सिरिजको घोषणाका साथै मिति र थप गर्नुपर्ने भौतिक पूर्वाधारबारे जानकारी दिने घिमिरेले बताइन् । 

घिमिरेका अनुसार नेपालसँग खेल्नका लागि वान डे अन्तर्राष्ट्रियको मान्यता पाएका एसोसिएट राष्ट्रहरु स्कटल्यान्ड र नेदरल्यान्ड्सले इच्छा देखाएका छन् । त्यस्तै आइसिसीको पूर्णकालीन सदस्यमा बढुवा भएको आयरल्यान्डले पनि नेपालसँग सिरिज खेल्न चाहना राखेको बताइएको छ ।