काठमाडौं- युएई टुरमा रहेको राष्ट्रिय क्रिकेट टोली आज विजयको उत्साह बोकेर स्वदेश फर्किएको छ। टोलीलाई राष्ट्रिय खेलकुद परिषद्ले विमानस्थलमा भव्य स्वागत गरेको थियो।
राखेपले क्रिकेट खेलाडीहरुलाई जनही ५ लाख दिन सिफारिस गर्ने भएको छ। खेलाडीहरुको स्वागतका लागि विमानस्थल पुगेका राखेपका सदस्य सचिव केशव विष्टले प्रत्येक खेलाडीलाई ५ लाख दिन भोलि मन्त्रालयमार्फत प्रस्ताव लैजाने बताएका हुन्।
युएईविरुद्धका एक दिवसीय र टी-२० दुवै सिरिज जितेको क्रिकेट टोली सोमबार दिउँसो त्रिभुवन अन्तर्राष्ट्रिय विमानस्थलमा ओर्लिएको हो। नेपालले युएईविरुद्धको तीन खेलको ओडिआई सिरिज २-१ र टी २० सिरिज पनि २-१ ले नै जितेको थियो।
नेपालले दुवै फर्म्याटमा सिरिज जितेको पहिलोपटक हो। दुबै सिरिजमा नेपालले पहिलो खेल हारेर पनि उत्कृष्ट पुनरागमन गर्दै बाँकी दुई खेल जित्तै सिरिज जितेको हो।
प्रकाशित: Dec 31, 2017| 18:23 आइतबार, पुस १६, २०७४