सुर्खेत- जिल्ला प्रहरी कार्यालय सुर्खेतले नेपाली काँग्रेसको पार्टी कार्यालय घेरावन्दी गरेर विशेष निगरानी बढाएको छ । कांग्रेसले विरोधका कार्यक्रमहरु गर्न थालेपछि प्रहरीले पार्टी कार्यालय वरिपरि प्रहरी परिचालन गरेर निगरानी बढाएको हो ।
विगत एक हप्तादेखि नेविसंघले मसाल जुलुस, पुत्ला दहनजस्ता बिरोधका कार्यक्रमहरु गरिरहेको छ । गत विहीवारदेखि नै प्रहरीहरु पार्टी कार्यालय वरिपरि प्रहरीहरु तैनाथ छन् । सुरुका दिनमा पार्टी कार्यालयको मूलगेटमै प्रहरीहरु परिचालन भएपनि अहिले भने अलि पर परिचालन गरिएको छ ।
पार्टी कार्यालयमै विद्यार्थीहरुले सरकार विरुद्धका विरोधका कार्यक्रमहरुको योजना बनाउने र बिरोध सुरुवात गर्ने भएकाले निगरानी बढाएको जिल्ला प्रहरी कार्यालयले जनाएको छ ।
प्रहरीको निगरानीप्रति कांग्रेस सुर्खेतका सभापति कमलराज रेग्मीले आपत्ति जनाए । उनले कार्यालय र गतिविधिप्रति विशेष निगरानी गर्नुपर्ने कुनै कारण नै नभएको भन्दै सभापति दैनिक कामकाजमा भने समस्या नभएको बताए ।
कांग्रेसले र उसको भातृ संगठनले सरकारविरुद्ध सडक संघर्षका कार्यक्रमहरु गर्न थालेपछि प्रहरीले सुरक्षा व्यवस्था कडा पारेको हो । बजार र आसपासका क्षेत्रहरुमा व्यापक प्रहरी परिचालन गरिएको छ । नेविसंघ सुर्खेतले विहीवारदेखि कडा विरोधका कार्यक्रमहरु गरिरहेको छ । कर्णाली प्रदेशका मुख्यमन्त्री महेन्द्रबहादुर शाहीको गाडीमा नारा लेखेर विरोध गर्नुका साथै पुत्ला दहन र मसाल जुलुस गरिहेको छभने कांग्रेसले आज विरोधसभा गर्ने थालेको छ ।
प्रकाशित: Dec 31, 2017| 18:23 आइतबार, पुस १६, २०७४