काठमाडौं- युएईसँगको तीन खेलको टी-२० सिरिजको पहिलो खेलमा नेपाल युएईसँग पराजित भएको छ । सिरिजको पहिलो खेलमा नेपाल युएईसँग २१ रनले पराजित भएको हो ।
युएईले दिएको १ सय ५४ रनको लक्ष्य पछ्याउने क्रममा नेपालले निर्धारित २० ओभरमा ७ विकेट गुमाउँदै मात्र १ सय ३२ रन बनाउन सक्यो । नेपालका लागि पहिलो अन्तराष्ट्रिय टी-२० खेल खेलेका सन्दीप जोराले अर्धशतकीय पारी खेले पनि टोलीलाई जित दिलाउन सकेनन् ।
उनले ४६ बल खेल्दै तीन चौका र एक छक्काको मद्दतमा ५३ रन बनाए । सोमपाल कामीले २७, कप्तान पारस खाड्काले २५ रन बनाउन बाहेक अन्य ब्याट्सम्यानले दोहोरो अंक छुन सकेनन् ।
युएईका लागि मोहमद माभिद, सुल्तान अहमद र जाहुर खानले समान २-२ विकेट लिए । त्यस्तै अमिर हायातले एक विकेट लिए ।
यो पनि पढ्नुस् : नेपालको टी-२० सिरिज : यस्तो छ खेल इतिहासयसअघि टस हारेर पहिले ब्याटिङको निम्तो पाएको युएईका लागि सैमन अनवरको अर्धशतकको मद्दतले १ सय ५३ रन बनाएको थियो । सैमनले ३८ बल खेल्दै पाँच चौका र दुई छक्काको मद्दतमा ५९ रनको अर्धसशतकीय पारी खेले । त्यस्तै मुहमद उसमनले ३० रन जोड्दा सिपी रिजवनले २२ रन जोडे । मोहमद बुटा २० रनमा अविजित रहँदा अन्य चार ब्याट्स्म्यानले दोहोरो अंक छुन सकेनन् ।
नेपालका लागि बसन्त रेग्मी र सन्दीप लामिछानेले समान २-२ विकेट लिए । सन्दीपको यो राष्ट्रिय टोलीका लागि टी-२० अन्तर्राष्ट्रिय प्रतियोगितामा पहिलो दुई विकेट हो । सोमपाल कामी र अभिनास बोहराले एक एक विकेट लिए । अब सिरिजाको दोस्रो खेल शुक्रबार खेल्ने छ । शुक्रबारको खेल नेपाली समय अनुसार दिउँसो २ः४५ बजे सुरु हुने छ ।
प्रकाशित: Dec 31, 2017| 18:23 आइतबार, पुस १६, २०७४